ప్రియురాలి ఫ్యామిలీ చేతిలో టెక్కీ దారుణ హత్య

By Pratap

Published: Thursday, March 15, 2012, 9:43 [IST]

హైదరాబాద్: ప్రియురాలి కుటుంబం చేతిలో హైదరాబాదుకు చెందిన ఓ సాఫ్ట్‌వేర్ ఇంజనీర్ దారుణ హత్యకు గురయ్యాడు. హైదరాబాదులోని సరూర్‌నగర్‌కు చెందిన సతీష్ అనే సాఫ్ట్‌వేర్ ఇంజనీర్‌ను అతని ప్రియురాలి తండ్రి యాదగిరి, మరో ఇద్దరి సహకారంతో హత్య చేసి, మృతదేహాన్ని కాల్చేశాడు. సాఫ్ట్‌వేర్ ఇంజనీర్ మరణం ఆచూకీ మెదక్ జిల్లా తూప్రాన్ అటవీ ప్రాంతంలో దొరికాయి. బెంగళూర్ విప్రోలో ఉద్యోగం చేస్తున్న సతీష్ జనవరి చివరి వారంలో హైదరాబాదు వచ్చాడు. ఫిబ్రవరి మొదటివారంలో అదృశ్యమయ్యాడు. సతీష్ తల్లిదండ్రులు సరూర్‌నగర్ పోలీసు స్టేషనులో ఫిబ్రవరి 4వ తేదీన ఫిర్యాదు చేశారు. అయినా ఫలితం లేకపోవడంతో మానవ హక్కుల కమిషన్‌ను ఆశ్రయించారు. మానవ హక్కుల కమిషన్ జోక్యంతో పోలీసులు దర్యాప్తు చేసి, సతీష్ హత్యకు గురైన విషయాన్ని కనిపెట్టారు.

హత్యకు పాల్పడిన సూరారం గ్రామానికి చెందిన యాదగిరిని, అతనికి సహకరించిన హైదరాబాదులోని బొరబండకు చెందిన ఇద్దరిని పోలీసులు అరెస్టు చేశారు. వారితో పాటు సతీష్ ప్రియురాలు అశ్వినిని కూడా పోలీసులు అదుపులోకి తీసుకున్నారు. సాక్ష్యాలు తారుమారు చేసినందుకు అశ్వినిని అరెస్టు చేశారు. సతీష్ సూరారం గ్రామానికి చెందిన అశ్వినిని ప్రేమించాడు. ఆమెను కలుసుకోవడానికి సతీష్ ఫోన్ చేసినప్పుడు ట్రాక్ చేసి, అతన్ని రప్పించి ఆమె తండ్రి యాదగిరి, మరో ఇద్దరి సహకారంతో హత్య చేసినట్లు భావిస్తున్నారు. సతీష్ దుస్తులను చెరువులో పడేశారు. 25 ఏళ్ల టెక్కీ సతీష్ తండ్రి శంకరయ్య కుటుంబం విషాద సముద్రంలో మునిగిపోయింది. కిడ్నాప్ చేసిన మర్నాడే తన కుమారుడిని హత్య చేసి ఉంటారని శంకరయ్య అంటున్నాడు.

Published On March 15, 2012