ఉప ఎన్నికలపై క్రికెట్ ఎఫెక్ట్: పదేపదే ఎన్నికలూ

By Srinivas

Published: Sunday, March 18, 2012, 21:42 [IST]

హైదరాబాద్: రాష్ట్రంలో ఉప ఎన్నికలు జరుగుతున్న ఏడు నియోజకవర్గాల్లో క్రికెట్ ప్రభావం పడినట్లుగా కనిపిస్తోంది. ఉదయం ఏడు గంటలకు ప్రారంభమైన పోలింగ్ జోరుగా ప్రారంభమైంది. దానిని చూసిన పరిశీలకులు భారీగా ఓటింగ్ నమోదవుతుందని భావించారు. అయితే రెండు, మూడు గంటలు మాత్రమే ఈ జోరు కనిపించినప్పటికీ ఆ తర్వాత తగ్గిపోయింది. ఉదయం ప్రజలు బారులు తీరారు. పదకొండు గంటల తర్వాత ఎండలు మండుతుండటంతో మందకోడిగా కొనసాగింది. అయితే ఎండ తగ్గిన తర్వాత సాయంత్రం మూడు గంటల సమయంలో మళ్లీ జోరు అందుకుంటుందని భావించారు. కానీ పోలింగ్ శాతం మాత్రం పెరగలేదు. అదే మందకోడి కొనసాగింది. మధ్యాహ్నం ఎండ ప్రభావం చూపగా ఆ తర్వాత క్రికెట్ ప్రభావం పడింది. శనివారం మధ్యాహ్నం భారత్ తన దాయాది పాకిస్తాన్‌తో మ్యాచ్ ప్రారంభించిన విషయం తెలిసిందే. దీంతో పలువురు ఓటర్లు ఓట్లు వేయడం కన్నా టీవిలకే అతుక్కు పోయారు. పాకిస్తానే మొదట బ్యాటింగ్ చేసినప్పటికీ కీలక మ్యాచ్, అదీ పాక్‌తో కావడంతో అభిమానులు పోలింగ్ కేంద్రాలకు రావడానికి ఆసక్తి చూపినట్లుగా కనిపించడం లేదు. ఓటింగ్ కేంద్రాల వద్ద యువత తక్కువగా కనిపించింది.

అదిలాబాద్ జిల్లా మహారాష్ట్ర సరిహద్దుల్లో ఉంది. అక్కడి ప్రజలకు మహారాష్ట్ర వారితో సంబంధాలు ఉన్నాయి. దీంతో చాలామంది పెళ్లిళ్ల కోసం మహారాష్ట్రకు వెళ్లినట్లుగా తెలుస్తోంది. అక్కడి నియోజకవర్గంలో ఈ ప్రభావం పడిందని తెలుస్తోంది. అంతేకాకుండా తెలంగాణ, అభివృద్ధి ఇలా పలు కారణాలు చెప్పి పదే పదే ఎన్నికలు తీసుకు రావడం పట్ల ప్రజలు అసంతృప్తితో ఉన్నారని అంటున్నారు. ఐదేళ్లకోసారి రావాల్సిన ఎన్నికలు పదే పదే రావడంతో ప్రజలు విసిగి పోతున్నారని అంటున్నారు. ఈ కారణంగానే వారు పోలింగ్ కేంద్రానికి రావడానికి విముఖత చూపిస్తున్నారని అంటున్నారు. ఉప ఎన్నికలు జరిగిన ఏడు నియోజకవర్గాల్లోనూ దాదాపు గత సాధారణ ఎన్నికల సమయంలోని ఓటింగ్ శాతం కంటే తగ్గే అవకాశాలు కనిపిస్తున్నాయి. దీంతో భారీ ఓటింగ్ జరిగి అత్యధిక మెజార్టీతో గెలుస్తామని భావించిన పార్టీల గుండెల్లో రైళ్లు పరుగెడుతున్నాయి.

Published On March 18, 2012