యుపిలో జీపును ఢీకొన్న రైలు, 15 మంది మృతి

By Srinivas

Published: Tuesday, March 20, 2012, 16:14 [IST]

లక్నో: ఓ జీపును రైలు ఢీకొనడంతో పదిహేను మంది మృతి చెందిన విషాద సంఘటన ఉత్తర ప్రదేశ్‌లో మంగళవారం చోటు చేసుకుంది. హస్రత్ సమీపంలో మధుర నుండి కాస్‌గంజ్ వెళుతున్న ప్యాసింజర్ రైలు కాపలా లేని లెవల్ క్రాసింగ్ వద్ద ఓ జీపును ఢీకొట్టింది. దీంతో ఈ ప్రమాదంలో అక్కడికి అక్కడే పదిహేను మంది మృతి చెందారు. మరో ఇద్దరి పరిస్థితి విషమంగా ఉంది. మృతి చెందిన వారిలో జీపు డ్రైవర్ కూడా ఉన్నాడు. గాయపడిన వారిని దగ్గరలోని అలీగఢ్ ప్రభుత్వ ఆసుపత్రికి తరలించారు.

ఈ సంఘటన ఉదయం ఏడున్నర గంటల సమయంలో మదు రైల్వే స్టేషన్‌కు సమీపంలో జరిగింది. ప్రమాదానికి గురైన జీపులో మొత్తం పదిహేడు మంది ప్రయాణిస్తున్నట్లు స్థానిక పోలీసులు చెబుతున్నారు. రైలు వస్తుండగా జీపు డ్రైవర్ ట్రాక్ దాటేందుకు ప్రయత్నాలు చేయడం వల్లనే ఈ ప్రమాదం జరిగిందని చెబుతున్నారు. కాగా ముకుల్ రాయ్ రైల్వే మంత్రిగా ప్రమాణ స్వీకారం చేయడానికి ముందు ఈ ప్రమాదం చోటు చేసుకోవడం గమనార్హం. దేశంలో సుమారు 15వేల కాపలా లేని రైల్వే క్రాసింగులు ఉన్నాయని అంచనా. వాటి పైన మంత్రి ఏం చర్యలు తీసుకుంటారో చూడాలి.

Published On March 20, 2012