టిడిఎల్పీకి హరీష్‌రావు, సిఎం వైపు దూసుకెళ్లిన నాగం

By Srinivas

Published: Tuesday, March 27, 2012, 13:59 [IST]

హైదరాబాద్: తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు మంగళవారం తెలుగుదేశం పార్టీ శాసనసభా పక్ష కార్యాలయానికి వచ్చారు. నిత్యం తెదేపా, ఆ పార్టీ అధ్యక్షుడు నారా చంద్రబాబు నాయుడు, ఆ పార్టీ నేతలపై విరుచుకు పడే హరీష్ రావు టిడిఎల్పీ కార్యాలయానికి రావడం ప్రాధాన్యత సంతరించుకుంది. ఈ సందర్భంగా ఆయన మాట్లాడారు. చంద్రబాబు నాయుడు తెలంగాణకు అనుకూలంగా నిర్ణయం తీసుకుంటే తాము ఆయనతో కలిసి పని చేసేందుకు సిద్ధంగా ఉన్నామని చెప్పారు. టిడిపి సీనియర్ శాసనసభ్యుడు, తెలంగాణ ఫోరం నేత ఎర్రబెల్లి దయాకర రావు రాజీనామా వాస్తవం అయితే ఆయన ఇమేజ్ తెలంగాణ ప్రాంతంలో పెరుగుతుందని అన్నారు.

కాగా సభలోనూ ఓ ఆసక్తికర సంఘటన చోటు చేసుకుంది. ముఖ్యమంత్రి కిరణ్ కుమార్ రెడ్డి మాట్లాడుతున్న సమయంలో తెలంగాణ నగారా సమితి అధ్యక్షుడు, నాగర్ కర్నూలు శాసనసభ్యుడు నాగం జనార్ధన్ రెడ్డి ముఖ్యమంత్రి వైపు ఒక్కసారిగా దూసుకు పోయారు. తెలంగాణపై తీర్మానం పెట్టే కనికరం లేదా అని సిఎంను నిలదీశారు. మానవత్వంతో మెలగాలని సిఎంకు సూచించారు. నాగం ఒక్కసారిగా సిఎం వైపు దూసుకు రావడంతో అందరూ ఒకింత ఆశ్చర్యానికి లోనయ్యారు. కాగా తెలంగాణ తీర్మానం కోసం పట్టుబడుతున్న బిజెపి, తెరాస, నాగం ఆ తర్వాత బెట్టి వీడి స్పీకర్‌తో భేటీ అయ్యారు.

Published On March 27, 2012