ఏడుపు మొహాలే: నాగంకు టిడిపి అన్నపూర్ణమ్మ షాక్

హైదరాబాద్: తెలుగుదేశం పార్టీ ఎమ్మెల్యే ఏలేటి అన్నపూర్ణమ్మ బుధవారం తెలంగాణ నగారా సమితి అధ్యక్షుడు, నాగర్ కర్నూలు ఎమ్మెల్యే నాగం జనార్ధన్ రెడ్డికి ఝలక్ ఇచ్చారు. ఆమె వ్యాఖ్యలతో నాగం ఒక్కసారిగా కంగుతిన్నారు. సభ వాయిదాపడిన తర్వాత అన్నపూర్ణమ్మ, ఉమా మాధవరెడ్డి లాబీల్లో నిల్చొని మాట్లాడుకుంటున్నారు. అదే సమయంలో పలువురు టిఆర్ఎస్ ఎమ్మెల్యేలతో కలిసి నాగం అటుగా వస్తూ వారివద్ద ఆగారు. టిడిపి ఎమ్మెల్యేలను ఉద్దేశించి.. ఆ పార్టీలో ఏముందని ఇంకా ఉంటున్నారు? బయటకు రండని అన్నారు. అందుకు అన్నపూర్ణమ్మ... పార్టీ నుంచి బయటకు వద్దామనే అనుకుంటున్నామని కానీ, మిమ్మల్ని చూసిన తర్వాతనే రాబుద్ధి కావటం లేదని బదులిచ్చారు. దీంతో విస్తుపోయిన నాగం ఎందుకని ప్రశ్నించారు.

తెలుగుదేశం పార్టీ నుంచి బయటకు వెళ్లిన వాళ్లను ఎవరిని చూసినా ఏడుపు ముఖాలే కనిపిస్తున్నాయన్నారు. ఎంత దాచుకుందామన్నా మీ ముఖంలోనూ ఏడుపు కనిపిస్తుందని, అందుకే టిడిపిలోనే ఉండాలని నిర్ణయించుకున్నామని, టిడిపిలో ఉన్నప్పుడు మీ మొహాలు ఆనందంగా ఉండేవని, ఇప్పుడు మాత్రం చిరాకుగా మాడిపోయి కనిపిస్తున్నాయన్నారు. కాగా టిఆర్ఎస్ ఎమ్మెల్యేలతో భేటీ అయిన తర్వాత ఈటెల రాజేందర్‌తో కలిసి బయటికి వచ్చిన నాగం, లోపలే ఉన్న తమ వర్గం ఎమ్మెల్యే వేణుగోపాలా చారిని ఉద్దేశించి.. టిఆర్ఎస్‌లో చేరి పోవయ్యా అని నవ్వూతూ అన్నారు. అక్కడే ఉన్న విలేకరులు.. మీరిద్దరూ చేరితే టిఆర్ఎస్ వెయిట్ పెరుగుతుంది కదా అని ప్రశ్నించగా అందుకు నాగం.. వేణుగోపాల చారి ఒక్కడు చేరితేనే టిఆర్ఎస్ వెయిట్ సగం పెరుగుతుంది, ఇక నేను కూడా చేరితే వెయిట్ బాగా పెరిగి వాళ్లు సైడ్ అవుతారని చమత్కరించారు.