జగన్ వ్యాఖ్యలను హరికృష్ణ బలపరుస్తున్నారా?

న్యూఢిల్లీ: వైయస్సార్ కాంగ్రెసు పార్టీ అధ్యక్షుడు వైయస్ జగన్ వ్యాఖ్యను తెలుగుదేశం పార్టీ రాజ్యసభ సభ్యుడు నందమూరి హరికృష్ణ బలపరుస్తున్నారా అనే ప్రశ్న ఉదయిస్తోంది. కాంగ్రెసు పార్టీతో తెలుగుదేశం పార్టీ అధ్యక్షుడు నారా చంద్రబాబు నాయుడు కుమ్మక్కయ్యారని వైయస్ జగన్ పదే పదే విమర్శిస్తున్నారు. ఇదే తరహా వ్యాఖ్యను హరికృష్ణ మరో రూపంలో చేశారు. తెలుగుదేశం నాయకులు కాంగ్రెసుతో కుమ్మక్కయ్యారని హరికృష్ణ ఆరోపించారు. వ్యాపారాల కోసం తమ పార్టీ నాయకులు కాంగ్రెసుతో లాలూచీ పడుతున్నారని ఆయన ఓ ప్రముఖ తెలుగు టీవీ చానెల్ ప్రతినిధి వద్ద అన్నారు. వైయస్ జగన్ వ్యాఖ్యలను ఆ టీవీ చానెల్ ప్రతినిధి ప్రస్తావించినప్పుడు ఆ వ్యాఖ్యలను తిరిగి చేశారు.

తమ పార్టీకి ఒకరి మోచేతి నీళ్లు తాగాల్సిన అవసరం లేదని, ప్రాణమైనా పోవాలి గానీ మరొకరితో లాలూచీ పడకూడదని, కొంత మంది తమ పార్టీ నాయకులు కాంగ్రెసుకో కుమ్మక్కయ్యారని ఆయన అన్నారు. దానివల్ల పార్టీ పరిస్థితి దిగజారిపోతోందని ఆయన అన్నారు. పార్టీ సరిగా అభివృద్ధి చెందడం లేదని ఆయన ఆవేదన వ్యక్తం చేశారు. కాంగ్రెసుతో తమ పార్టీ నాయకులు కమ్మక్కయ్యే వైఖరిని అడ్డుకోవాల్సిన అవసరం ఉందని ఆయన అభిప్రాయపడ్డారు. పార్టీ తీరుపై హరికృష్ణ ఇప్పటికే పార్టీ అధ్యక్షుడు నారా చంద్రబాబు నాయుడిపై పరోక్ష విమర్శలు చేశారు.

English summary

It is a question that wether TDP Rajyasabha member Harikrishna endorsing YSR Congress president YS Jagan comments.