ఒకే వేదికపై నవీన్, జయలలిత: కూటమి పుకార్లు

By Pratap

Published: Friday, May 11, 2012, 15:17 [IST]

హైదరాబాద్: తమిళనాడు ముఖ్యమంత్రి జయలలిత, ఒడిషా ముఖ్యమంత్రి నవీన్ పట్నాయక్ తమిళనాడు రాజధాని చెన్నైలో ఒకే వేదికను పంచుకున్నారు. చెన్నై మద్రాసు విశ్వవిద్యాలయంలోని సెంటనరీ ఆడిటోరియంలో జరిగిన సమావేశంలో వీరిద్దరు శుక్రవారం పాల్గొన్నారు. వారిద్దరు ముఖాముఖి చర్చలు కూడా జరపబోతున్నట్లు వార్తలు వస్తున్నాయి. దీంతో జాతీయ స్థాయిలో తృతీయ కూటమి ఏర్పాటుపై పుకార్లు పెరుగుతన్నాయి.

రెండు రోజుల పర్యటన నిమిత్తం నవీన్ పట్నాయక్ గురువారం చెన్నై వచ్చారు. ఉగ్రవాద నిరోధక జాతీయ కేంద్రం (ఎన్‌సిటిసి) ఏర్పాటుపై అధ్యయనం చేయడానికి ఏర్పాటయ్యే ముఖ్యమంత్రుల సబ్ కమిటీకి జయలలిత నేతృత్వం వహిస్తారని నవీన్ పట్నాయక్ గురువారం చెప్పారు.

ప్రస్తుత రూపంలో ఎన్‌సిటిసి ఏర్పాటును వ్యతిరేకిస్తున్న కాంగ్రెసేతర ముఖ్యమంత్రుల్లో జయలలిత, నవీన్ పట్నాయక్ ఉన్నారు. జూన్‌లో రాష్ట్రపతి ఎన్నికలు జరగనున్న నేపథ్యంలో జాతీయ స్థాయిలో రాజకీయ సమీకరణాల మార్పుపై నవీన్ పట్నాయక్ పర్యటన ఊహాగానాలు చెలరేగుతున్నాయి. తమ వ్యహాన్ని రూపొందించుకోవడానికి తమ పార్టీ పార్లమెంటు సభ్యుల నుంచి, శానససభ్యుల నుంచి అభిప్రాయాలు కోరినట్లు నవీన్ పట్నాయక్ చెప్పారు.

కేంద్ర ప్రభుత్వం తలపెట్టిన ఎన్‌సిటిసిని నరేంద్ర మోడీతో పాటు జయలలిత, నవీన్ పట్నాయక్ తీవ్రంగా వ్యతిరేకిస్తున్నారు. అలాగే, రాష్ట్రపతి ఎన్నికల్లో కాంగ్రెసు, బిజెపియేతర పార్టీలు అనుసరించాల్సిన వైఖరిపై కూడా వారిద్దరి మధ్య చర్చలు జరుగుతున్నట్లు తెలుస్తోంది.

Published On May 11, 2012