రాజకీయం చేయొద్దు: జోగి, నిలిపివేయాల్సిందే.. హరీష్

By Srinivas

Published: Thursday, July 5, 2012, 8:45 [IST]

విజయవాడ/నల్గొండ: కృష్ణా డెల్టాకు సాగునీటిని విడుదల చేయటాన్ని రాజకీయం చేయొద్దని కృష్ణా జిల్లా శాసనసభ్యులు జోగి రమేష్, మల్లాది విష్ణు బుధవారం సూచించారు. నాగార్జున సాగర్ జలాలపై తీర ప్రాంతంలో ఉన్న కృష్ణా డెల్టాకు హక్కు ఉందన్నారు. అయినా నీటి విడుదలను రాజకీయం చేయటాన్ని వారు తప్పుబట్టారు. నారు మడులు, తాగు అవసరాల కోసం కృష్ణా తూర్పు డెల్టా కాల్వలకు తొలి విడతగా 500 క్యూసెక్కుల నీటిని వారు బుధవారం విడుదల చేశారు.

వాతావరణం అనుకూలంగా లేకపోవటం వల్లే నీటి సమస్య తలెత్తిందని, తాగునీటికి, నారుమళ్ల కోసం నీటిని విడుదల చేయాలని ముఖ్యమంత్రి కిరణ్ కుమార్ రెడ్డిని కోరామని సీమాంధ్ర ఎమ్మెల్యేల ఫోరం కన్వీనర్ జోగి రమేష్ తెలిపారు. డెల్టాకు నీటిని విడుదల చేయవద్దనటం రైతాంగం ఆత్మస్థైర్యాన్ని దెబ్బతీయటమేనని విజయవాడ సెంట్రల్ ఎమ్మెల్యే మల్లాది విష్ణు అన్నారు.

సీమాంధ్ర పాలకులకు అవకాశమిస్తే నీళ్లనే కాదు... తెలంగాణ ప్రజల కన్నీళ్లను కూడా తరలించుకుపోతారని తెలంగాణ రాష్ట్ర సమితి ఉపనేత, సిద్దిపేట శాసనసభ్యుడు హరీష్‌ రావు ఎద్దేవా చేశారు. కృష్ణా డెల్టాకు నీటి విడుదలను నిరసిస్తూ టిఆర్ఎస్ ఆధ్వర్యంలో నల్లగొండ జిల్లా కోదాడలో బుధవారం నిర్వహించిన మహాధర్నాలో ఆయన పాల్గొన్నారు.

కృష్ణా డెల్టాకు నీటి విడుదలను తక్షణం నిలిపివేయకుంటే సాగర్‌ను ముట్టడిస్తామని హెచ్చరించారు. ఉప ఎన్నికల్లో తెలంగాణపై ప్రేమ కనబర్చిన వైఎస్సార్ కాంగ్రెస్ పార్టీ నాయకురాలు విజయలక్ష్మి ఇప్పుడు మాట్లాడరేమిటని ప్రశ్నించారు.

Published On July 5, 2012