వైయస్ జగన్ పార్టీ ఓ ప్రైవేట్ కంపెనీ: రాహుల్ గాంధీ

న్యూఢిల్లీ: వైయస్ జగన్ నాయకత్వంలోని వైయస్సార్ కాంగ్రెసు పార్టీని ఎఐసిసి ప్రధాన కార్యదర్శి రాహుల్ గాంధీ ఓ ప్రైవేట్ కంపెనీగా అభివర్ణించారు. కాంగ్రెసు బిసి నేతలు నారగోనీ, పిఎన్ జనార్దన్, యాదగిరి, కాపర్తి మోహన్ తదితరులు సోమవారం రాహుల్ గాంధీని కలిశారు. తాము కలిసినప్పుడు రాహుల్ గాంధీ ఆ వ్యాఖ్య చేశారని వారు చెప్పారు. జగన్ పార్టీ వంటి ప్రైవేట్ కంపెనీ వల్ల న్యాయం జరగదని రాహుల్ గాంధీ తమతో అన్నట్లు వారు మీడియా ప్రతినిధులతో చెప్పారు.

రాష్ట్రంలో బీసిలకు కాంగ్రెసు వంటి జాతీయ పార్టీలే న్యాయం చేయగలవని రాహుల్ గాంధీ అన్నారు. వచ్చే ఎన్నికల్లో రాష్ట్రంలో బీసిలకు కాంగ్రెసు పార్టీ అధిక సీట్లు కేటాయిస్తుందని ఆయన హామీ ఇచ్చారు. రాష్ట్రంలో గత ఎన్నికల్లో కాంగ్రెసు 68 సీట్లు మాత్రమే ఇచ్చాయని, ప్రజారాజ్యం, తెలుగుదేశం పార్టీలు చెరో వంద సీట్లు ఇచ్చాయని బిసి నేతలు రాహుల్‌తో చెప్పారు.

దానికి కారణాలను రాహుల్ అడిగారని, ఆస్మదీయులకు, అవినీతిపరులకు, ధనవంతులకు సీట్లు ఇవ్వడం కాంగ్రెసు పార్టీలో పరిపాటిగా ఉంటోందని తాము చెప్పామని వారు వివరించారు. ఈ విషయంలో తగిన న్యాయం చేస్తామని రాహుల్ గాంధీ హామీ ఇచ్చినట్లు వారు తెలిపారు. రాష్ట్ర రాజకీయాల గురించి రాహుల్ తమతో దాదాపు 20 నిమిషాలు మాట్లాడినట్లు వారు తెలిపారు.

తెలుగుదేశం పార్టీ బిసీ డిక్లరేషన్‌ను ప్రకటించి, వచ్చే ఎన్నికల్లో బీసీలకు వంద సీట్లు ఇస్తామని హామీ ఇచ్చిన నేపథ్యంలో బీసీ నేతలు రాహుల్ గాంధీని కలిశారు.

English summary

AICC general secretary Rahul Gandhi has termed YS Jagan's YSR Congress party as a private Company and said it will not do justice. Rahul said that Congress will give proirity to BCs.