గాంధీ కుటుంబంపై అదే భావన, కోపం లేదు: అమితాబ్

న్యూఢిల్లీ: తన మనసులో రాజీవ్ గాంధీ కుటుంబం పట్ల ఎలాంటి వ్యతిరేక భావం లేదని బాలీవుడ్ సూపర్ స్టార్ అమితాబ్ బచ్చన్ చెప్పారు. ఆజ్ తక్ చానల్‌కిచ్చిన ఇంటర్వ్యూలో ఆయన ఈ విషయాన్ని వెల్లడించారు. తన మనసులో రాజీవ్ కుటుంబం పట్ల ఆనాడు ఎలాంటి భావనలు ఉన్నాయో నేటికీ అవే భావనలు ఉన్నాయని, వారి కుటుంబం పట్ల కోపతాపాలు, అలకల వంటివి లేశమాత్రమైనా లేవని, అసలు ఏ విధమైన వ్యతిరేక భావం లేదని అమితాబ్ ఆ ఇంటర్వ్యూలో చెప్పారు.

గాంధీ కుటుంబం పట్ల నేటికీ అదే మైత్రి బంధం... భావన ఉన్నాయని తెలిపారు. ఆ కుటుంబాన్ని తాను సర్వదా గౌరవిస్తానని, అప్పుడప్పుడు ఏదైనా కార్యక్రమాలలో తారసపడుతుంటామని, అప్పుడు చాలా మామూలుగానే ఉంటామని చెప్పారు. కాగా మాజీ ప్రధాని రాజీవ్ గాంధీకి అమితాబ్ స్నేహితుడన్న విషయం తెలిసిందే. రాజీవ్ ప్రోత్సాహంతో.. 1984లో అమితాబ్ అలహాబాద్ లోక్‌సభ స్థానంలో పోటీ చేసి గెలిచారు.

అయితే... అప్పట్లో బోఫోర్స్ కుంభకోణంలో అమితాబ్ కుటుంబానికి కూడా పాత్ర ఉందని ఆరోపణలు రావడంతో.. ఆయన రాజీనామా చేశారు. అప్పటి నుంచి గాంధీ కుటుంబంతో.. అమితాబ్‌గానీ, ఆయన కుటుంబసభ్యులు గానీ అంటీముట్టనట్లుగా ఉంటున్నారు. తాజాగా ఈ అంశంపై ఇంటర్వ్యూలో ప్రశ్నించగా అమితాబ్ పై విధంగా స్పందించారు.

English summary

Amitabh Bachchan, whose relationship with the Gandhi family have been strained over the years, says in his mind there is no change in feelings about them and that there is "no anger, no angst" from his side.