నో అన్నదని ఫేక్‌ ఫేస్‌బుక్, అశ్లీలమెయిల్స్: టెక్కీ అరెస్ట్

By Srinivas

Published: Tuesday, October 9, 2012, 11:08 [IST]

తనతో పాటు పని చేసిన ఓ యువతి పేరిట నకిలీ ఈ-మెయిళ్లు, ఫేస్‌బుక్ ఖాతాలు సృష్టించి, వాటి నుండి స్నేహితులకు, ఇతరులకు, అసభ్య మెయిళ్లు, ఫోటోలు పంపుతున్న సాయి కుమార్ అనే 28 ఏళ్ల యువకుడిని సిఐడి పోలీసులు సోమవారం శంషాబాద్ విమానాశ్రయంలో అరెస్టు చేశారు. ఇతను యుఎస్‌లో మహీంద్ర సత్యం కంపెనీలో సాఫ్టువేర్ ఇంజనీర్‌గా పని చేస్తున్నాడు. అమెరికా నుండి వస్తున్న విషయం తెలుసుకున్న సిఐడి పోలీసులు సోమవారం ఉదయం అతను విమానం దిగగానే అదుపులోకి తీసుకున్నారు.

ఈ విషయాన్ని సిఐడి అదనపు డిజి ఎస్వీ రమణమూర్తి వెల్లడించారు. బాధితురాలు అతని ప్రేమ, పెళ్లి ప్రపోజలన్‌ను తిరస్కరించడంతో సాయి కుమార్ ఈ దుర్మార్గానికి పాల్పడ్డాడు. సాయి కుమార్ పోలీసులకు తెలిపిన వివరాల ప్రకారం... ఇతను మొదట హైదరాబాదులో మూడేళ్లు పని చేశాడు. అదే కంపెనీలో ఉద్యోగం చేస్తున్న యువతితో పరిచయం అయింది. సాయి కుమార్ ఆమె ముందు పెళ్లి ప్రపోజల్ పెట్టాడు. ఆమె నిరాకరించింది.

అప్పటి నుండి అతను ఆ యువతినిని బ్లాక్ మెయిల్ చేయడం ప్రారంభించాడు. ఆత్మహత్య చేసుకుంటానని బెదిరించాడు. అయితే ఆ యువతి కౌన్సెలింగ్ ద్వారా అతడిని మార్చే ప్రయత్నాలు చేసిందని పోలీసులు చెబుతున్నారు. ఆ తర్వాత ఇతను 2011లో అమెరికాకు వెళ్లాడు. అక్కడికి వెళ్లినప్పటికీ అతను యువతిని బ్లాక్ మెయిల్ చేయడం మానలేదు. ఆమె ఈ మెయిల్స్‌ హ్యాక్ చేయడం, ఆమె పేరు మీద ఫేక్ ఫేస్ బుక్ సృష్టించి కంపెనీ సహచరులకు, స్నేహితులకు, ఇతరులకు ఆమె పేరు మీద అశ్లీల ఫోటోలు పంపడం చేస్తుండేవాడు.

ఇద్దరూ ఒకే దగ్గర పని చేసిన సమయంలో వారిద్దరు కలిసి ఫోటోలు దిగారు. వీటిని ఉపయోగించి అతడు ఫేక్ ప్రొఫైల్స్ తయారు చేసి బాధితురాలి ఇమేజ్ దెబ్బతీసే ప్రయత్నాలు చేశాడు. ఆమె పేరుతో రూపొందించిన వాటి ద్వారా అతను ఆమె సన్నిహితులు, బంధువులతో ఇష్టం వచ్చినట్లుగా చాట్ చేసేవాడు. పోలీసులు అతనిపై ఐపిసి 506, 384, 66ఏ, 67 ఐటి యాక్ట్ కింద కేసు నమోదు చేసి దర్యాఫ్తు చేస్తున్నారు.

Published On October 9, 2012