తెలుగులో జగన్ పార్టీ వెబ్సైట్: పార్టీలో చేరనున్న జిట్టా
కాగా వెబ్ సైట్ను ప్రారంభించిన అనంతరం వైయస్ విజయమ్మ మాట్లాడుతూ... పార్టీకి, ప్రజలకు ఇది అనుసంధానంగా ఉంటుందని ఆశాభావం వ్యక్తం చేశారు. ప్రపంచవ్యాప్తంగా ఉన్న దివంగత వైయస్ రాజశేఖర రెడ్డి అభిమానులు, వైయస్సార్ కాంగ్రెసు పార్టీ కార్యకర్తలకు ఇది ఉపయోగపడుతుందన్నారు.
జగన్ పార్టీలోకి జిట్టా
వైయస్సార్ కాంగ్రెసు పార్టీలో తెలంగాణ యువ జెఏసి చైర్మన్ జిట్టా బాలకృష్ణా రెడ్డి చేరనున్నారు. ఆయన మంగళవారం మధ్యాహ్నం పార్టీ గౌరవ అధ్యక్షురాలు వైయస్ విజయమ్మను కలిశారు. ఈ నెల 29న భువనగిరిలో భారీ ఎత్తున బహిరంగ సభను ఏర్పాటు చేసి విజయమ్మ సమక్షంలో జగన్ పార్టీలో చేరుతానని జిట్టా చెప్పారు. తెలంగాణ ప్రజల మనోభావాలను తాము గౌరవిస్తున్నామని, ప్రత్యేక రాష్ట్రం ఇచ్చేది కేందమే కనుక వారు ఏ నిర్ణయం తీసుకున్నా కట్టుబడి ఉంటామని జగన్ పార్టీ చెప్పిందని జిట్టా అన్నారు.
దివంగత వైయస్ రాజశేఖర రెడ్డికి తెలంగాణలోనూ అభిమానులు ఉన్నారని కెకె మహేందర్ రెడ్డి అన్నారు. పరకాల ఉప ఎన్నికలలో కొండా సురేఖకు వచ్చిన ఓట్లను బట్టి ఈ విషయం అర్థమవుతోందన్నారు. వైయస్ పథకాలు అన్నీ కిరణ్ కుమార్ రెడ్డి ప్రభుత్వం పక్కన పెడుతోందని ఆరోపించారు.