చిరు ప్రెస్ మీట్ వివాదాస్పదం: స్పీకర్ ఆంక్ష బేఖాతరు

By Srinivas

Published: Sunday, December 2, 2012, 9:58 [IST]

హైదరాబాద్: కేంద్రమంత్రి చిరంజీవి మీడియా సమావేశం ఒకటి వివాదాస్పదమైంది. అసెంబ్లీలో సమావేశాలు జరుగుతున్న సమయంలో సభ వాయిదా పడిన అరగంట తర్వాతే అసెంబ్లీ ఆవరణలోకి గానీ, పార్టీ శాసనసభా పక్ష కార్యాలయాల వరకు గానీ మీడియాను అనుమతిస్తున్నారు. స్పీకర్ నాదెండ్ల మనోహర్ ఇటీవల ఈ ఆదేశాలను జారీ చేశారు. స్పీకర్ జారీ చేసిన ఆదేశాల ప్రకారం ఉదయం సభ మొదలైనప్పటి నుండి వాిదా పడే వరకు మీడియా ప్రత్యక్ష ప్రసారాలకు అనుమతించడం లేదు.

అయితే శనివారం చిరంజీవి మీడియా సమావేశం ఒకటి వివాదాస్పదమైంది. కేంద్ర పర్యాటక శాఖ సహాయమంత్రిగా(స్వతంత్ర హోదా)లో ఉన్న చిరంజీవి కోసం ఈ నిబంధనలు ఉల్లంఘించారు. చిరంజీవి స్పీకర్ నాదెండ్ల మనోహర్‌ను కలిశారు. అనంతరం ఆయన కాంగ్రెసు పార్టీ శాసనసభా కార్యాలయానికి(సిఎల్పీ) వెళ్లారు. అసెంబ్లీలో ఉన్న ఓ అధికారి స్వయంగా సమావేశాలు జరుగుతున్నప్పుడు మీడియా ఫోటో గ్రాఫర్లను లోపలకు తీసుకు వెళ్లారు.

పోలీసు ఉన్నతాధికారులు అడ్డు చెప్పినప్పటికీ వారిని లోనికి తీసుకు వెళ్లారు. మీడియా లోపలకు రావడంతో స్పీకర్ ఒకింత ఆశ్చర్యానికి లోనయ్యారు. తర్వాత సభ వాయిదా పడకముందే.. చిరంజీవి సిఎల్పీ కార్యాలయంలో జరిపిన విలేకర్ల సమావేశాన్ని ప్రత్యక్ష ప్రసారం చేయడానికి మీడియాకు అనుమతించారు. స్పీకర్ జారీ చేసిన ఆదేశాలను తుంగలో తొక్కారని తెలుగుదేశం, వైయస్సార్ కాంగ్రెసు పార్టీలు అభ్యంతరం వ్యక్తం చేశాయి.

Published On December 2, 2012