నేను శ్రమిస్తుంటే మీరు ఇలా: బాబు, దేవేందర్ సాకులు

న్యూఢిల్లీ: ఎఫ్‌డిఐలపై ఓటింగుకు ముగ్గురు సభ్యులు రాజ్యసభకు గైర్హాజరు కావడంపై తెలుగుదేశం పార్టీ అధ్యక్షుడు నారా చంద్రబాబు నాయుడు తీవ్రంగా మండిపడ్డారు. తొలుత ఆశ్చర్యం వ్యక్తం చేసిన ఆయన ఆ తర్వాత సీరియస్ అయ్యారు. ఆ ముగ్గురి నుంచి వివరణ కోరుతూ లేఖలు రాయాలని పార్టీ కార్యాలయాన్ని ఆదేశించారు. ఎఫ్‌డిఐలపై ఓటింగుకు తెలుగుదేశం సభ్యులు దేవేందర్ గౌడ్, సుధారాణి, సుజనా చౌదరి రాజ్యసభకు గైర్హాజరు కావడంతో తీవ్ర దుమారం చెలరేగింది.

"పాదయాత్ర చేస్తూ నేను ఇలా శ్రమిస్తూ ఉంటే మీరు ఇలా చేస్తారా?" అని చంద్రబాబు ఎంపిలపై మండిపడ్డారు. అయితే, తెలుగుదేశం రాజ్యసభ సభ్యులు మాత్రం సాకులు చెబుతున్నారు. బిఎస్పీ అధినేత మాయావతి ప్రభుత్వానికి మద్దతు పలకడంతో ఎలాగైనా ప్రభుత్వం గెలుస్తుందని తాము తేలిగ్గా తీసుకున్నామని రాజ్యసభ సభ్యుడు దేవేందర్ గౌడ్ అన్నారు.

డాక్టర్ అపాయింట్‌మెంట్ ఉంది కాబట్టి తాను రాజ్యసభకు ఆ సమయంలో వెళ్లలేకపోయానని ఆయన అన్నారు. ముగ్గురు సభ్యులు వివరణ ఇచ్చిన తర్వాత షోకాజ్ నోటీసులు జారీ చేసే విషయంపై ఆలోచన చేస్తామని తెలుగుదేశం రాజ్యసభ సభ్యుడు సిఎం రమేష్ అన్నారు. రమేష్‌తో పాటు నందమూరి హరికృష్ణ మాత్రం రాజ్యసభకు హాజరయ్యారు.

ముగ్గురు సభ్యులు కూడా వ్యక్తిగత కారణాల వల్లనే సభకు హాజరు కాలేదని సిఎం రమేష్ చెప్పారు. బిఎస్పీ నేత మాయావతి ప్రభుత్వానికి మద్దతు పలకడంతో తమ సభ్యులు ఓటింగును తేలిగ్గా తీసుకున్నారని ఆయన చెప్పారు. ముగ్గురు సభ్యులు సభకు గైర్హాజరు కావడంపై ముందు చంద్రబాబుకు తెలియదని, తాను చెప్పిన తర్వాతనే తెలిసిందని ఆయన అన్నారు.

English summary

Telugudesam president N Chandrababu Naidu asked explanation from 3 Rajyasabha members. Absence of party three members to the Rajyasabha at the time of voting on FDIs is creating havoc in Telugudesam party. TRS leaders are lashing out at TDP president Chandrababu on this development.