నావల్లే: యడ్డీ నోట జగన్ మాట, 10 మంది ఎమ్మెల్యేలు

బెంగళూరు: కర్నాటక జనతా పార్టీ నేత, మాజీ ముఖ్యమంత్రి యడ్యూరప్ప ఆదివారం కర్నాటక జనతా పార్టీనీ లాంఛనంగా ప్రారంభించారు. ఈ సందర్భంగా ఆయన ఆంధ్రప్రదేశ్ రాజకీయాల్లో ఉవ్వెత్తున ఎగిసిన వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తరహా వ్యాఖ్యలు చేశారు. ఆదివారం ఆయన హవేరీ పట్టణంలో భారీ బహిరంగ సభను లక్షలాది మంది అభిమానుల మధ్య నిర్వహించారు.

తన మాతృ పార్టీ భారతీయ జనతా పార్టీకి సవాల్ విసిరారు. బిజెపికి దమ్ముంటే అసెంబ్లీని రద్దు చేసి జనంలోకి రావాలని ఛాలెంజ్ చేశారు. రాష్ట్రంలో జగదీష్ శెట్టార్ ప్రభుత్వానికి కాలం చెల్లిందన్నారు. తన మద్దతుదారుల వల్లనే బిజెపి రాష్ట్రంలో మనుగడ సాగిస్తోందన్నారు. ఎపి రాజకీయాల్లో గతంలో జగన్ కూడా ఇలాంటి వ్యాఖ్యలే చేశారు. తన వల్లే కిరణ్ కుమార్ రెడ్డి ప్రభుత్వం రాష్ట్రంలో నిలబడుతోందన్నారు. ఇప్పుడు కర్నాటక రాజకీయాల్లో యడ్డీ అలాంటి వ్యాఖ్యలే చేయడం గమనార్హం.

తనపై బిజెపి అధిష్టానం వైఖరిని ప్రజలు గమనిస్తున్నారన్నారు. తన మద్దతుదారులు ఎవరూ పార్టీ నుండి ఇప్పుడు బయటకు రారన్నారు. వారిని వైదొలగాలని తాను ఎలాంటి ఒత్తిళ్లు చేయడం లేదన్నారు. తన కారణంగానే ప్రభుత్వం నిలబడిందన్నారు. బిజెపికి దమ్ముంటే ఆ ఎమ్మెల్యేలపై చర్యలు తీసుకోవాలని డిమాండ్ చేశారు. కాగా యడ్యూరప్ప హవేరీలో బహిరంగ సభను ఏర్పాటు చేసి బిజెపికి తన బలాన్ని చూపించారు.

యడ్యూరప్ప సభలో వేదికపై అధికార పార్టీకి చెందిన దాదాపు పదిమంది ఎమ్మెల్యేలు పాల్గొన్నారు. మరికొందరు ఎమ్మెల్యేలు, మంత్రులు, ఎంపీలు ఆయనకు మద్దతుగా అక్కడే ఉన్నప్పటికీ వేదిక పైకి రానట్లుగా చెబుతున్నారు. యడ్డీ సభలో బిజెపి తనకు చేసిన మోసం గురించి వివరిస్తున్నారు. కాగా యడ్యూరప్ప బయటకు వెళ్లి పోవడంతో ప్రభుత్వాన్ని రక్షించుకునేందికి బిజెపి ప్రయత్నాలు సాగిస్తోంది.

English summary

Famous for cardamom processing and a gateway to North Karnataka, Haveri town is all decked up to play host to the launch of a new regional political outfit today, floated by former BJP strongman BS Yeddyurappa.