కాంగ్రెస్ భేటీలో జెండాలతో బంగి అనంతయ్య హల్‌చల్

హైదరాబాద్: కర్నూలు మాజీ మేయర్ బంగి అనంతయ్య ఆదివారం హైదరాబాదులో కాంగ్రెసు పార్టీ జెండాలతో హల్ చల్ చేశారు. తెలుగుదేశం పార్టీ నుండి బహిష్కరణకు గురైన బంగి అనంతయ్య ఆరు నెలల క్రితం కాంగ్రెసు పార్టీలో చేరిన విషయం తెలిసిందే. ఈ రోజు హైదరాబాదులోని ఎల్బీ స్టేడియంలో ఏర్పాటు చేసిన కాంగ్రెసు పార్టీ మేధోమధన సదస్సుకు ఆయన హాజరయ్యారు. అక్కడ కాంగ్రెసు జెండాలతో కనిపించిన ఆయనను మీడియా పలకరించింది.

తాను తెలుగుదేశం పార్టీలో ఉండగా పార్టీ అభివృద్ధి కోసం తన ఆస్తిని మొత్తం ఖర్చు పెట్టానన్నారు. కానీ టిడిపి అధ్యక్షుడు నారా చంద్రబాబు నాయుడు తనకు మోసం చేశారని విమర్శించారు. నా ఉసురు తగిలి రెండుసార్లు ఇప్పటికే అధికార పీఠానికి దూరంగా ఉన్నాడని, మూడోసారి కూడా ఓడిపోతున్నాడని జోస్యం చెప్పారు. 2014 ఎన్నికల్లో టిడిపి ఓడుతుందనడంలో ఎలాంటి అనుమానం లేదన్నారు. ఈ రోజు తనను సస్పెండ్ చేసిన రోజన్నారు.

తన సతీమణి మార్కెట్ యార్డులో కూలీ పని చేస్తోందని ఆవేదన వ్యక్తం చేశారు. కాంగ్రెసు పార్టీ జాతీయ పార్టీ అని.. ఈ పార్టీ పర్మినెంట్‌గా ఉంటుందన్నారు. కాంగ్రెసు సముద్రం వంటిదని.. ప్రాంతీయ పార్టీలు సముద్రంలో కలిసి పోవాల్సిందే అన్నారు. పిల్ల కాలువలైన ప్రాంతీయ పార్టీలు ఎప్పటికీ ఉండవన్నారు. తాను ఇక నుండి కర్నూలు జిల్లా కాంగ్రెసు పార్టీలో యాక్టివ్ రోల్ పోషిస్తానన్నారు.

English summary

Kurnool former Mayor Bangi Ananthaiah was appeared in Congress meeting on Sunday.