ముఖేష్ అంబానీ ఇంటి ముందు కారు కలకలం, తనిఖీ

ముంబయి: రిలయన్స్ సంస్థల అధినేత ముఖేష్ అంబానీ నివాసం ముందు ఆదివారం కారు కలకలం చెలరేగింది. ముఖేష్ ఇళ్లు యాంటిలియా వెలుపల ఆదివారం గుర్తు తెలియని వాహనాన్ని నిలిపి ఉంచడంతో కారు బాంబు భయంతో భద్రతా సిబ్బంది పరుగులు పెట్టారు. ముంబయిలోని ఆల్టమౌంట్ రోడ్డులోని 27 అంతస్తుల ఆంటిలియా గేటుకు సమీపంలో ఆదివారం సాయంత్రం గుర్తు తెలియని వ్యక్తులు మారుతి స్విఫ్ట్ డిజైర్ వాహనాన్ని నిలిపి ఉంచారు.

అక్కడ కాపలాకాస్తున్న సెక్యూరిటీ గార్డు వద్దని చెప్పినప్పటికీ సదరు వ్యక్తి గార్డు వ్యాఖ్యలను పట్టించుకోకుండా అక్కడే పార్క్ చేసి వెళ్లిపోయాడు. దీంతో గార్డుకు అనుమానం వచ్చింది. తన సీనియర్‌లకు సమాచారం అందించాడు. వెంటనే సెక్యూరిటీ గార్డులు స్థానిక పోలీసులకు సమాచారం అందించారు.

వెంటనే బాంబు నిర్వీర్య బృందం, డాగ్ స్క్వాడ్, పోలీసులు హుటాహుటిన కారు నిలిపి వేసిన ప్రాంతానికి చేరుకున్నారు. కారును క్షుణ్ణంగా తనిఖీ చేశారు. అయితే, అందులో ఎలాంటి పేలుడు పదార్థాలు లేవని నిర్ధారించారు. అదే సమయానికి కారు యజమాని అక్కడకు చేరుకున్నాడు. సమీపంలో ఉన్న వీనస్ అపార్టుమెంటులో ఒకరిని కలుసుకునేందుకు వచ్చానని అందుకే కారు అక్కడ నిలిపినట్లు చెప్పారు.

కాగా సోమవారం ఢిల్లీలోని రద్దీ ప్రదేశాల్లో ఒకటైన ధౌలా కౌన్ ప్రాంతంలో సోమవారం మధ్యాహ్నం 3.30 గంటల సమయంలో ఇద్దరు యువకులు మోటార్ సైకిల్‌పై వచ్చి ఆర్మీ రీసెర్చ్ అండ్ రిఫరల్ ఆస్పత్రి సమీపంలో ఒక ల్యాప్‌టాప్ బ్యాగ్‌ను వదిలిపెట్టారని పోలీసులకు ఫోన్ రావడం, వెంటనే పోలీసులు అప్రమత్తమై బాంబుల జాడను పసిగట్టే శునకాలతో పాటు సైన్యంలోని బాంబు నిర్వీర్య దళాలు కూడా వెంటనే రంగంలోకి దిగి పరిశీలించడంతో ఇటుకలు, ల్యాప్ టాప్ వైర్లు కనిపించిన విషయం తెలిసిందే.

English summary

As the Hyderabad twin blasts made situation in the city volatile, an unidentified car parked outside industrialist Mukesh Ambani's towering mansion Antilia sparked bomb scare on Sunday evening.