సిబిఐ జెడి కాల్ డేటా లీక్: సుప్రీం నోటీసులు

By Pratap

Updated: Saturday, March 2, 2013, 10:54 [IST]

న్యూఢిల్లీ: సిబిఐ జాయింట్ డైరెక్టర్ వివి లక్ష్మినారాయణ కాల్ డేటా లీక్ కేసులో సుప్రీంకోర్టు శుక్రవారం నిందితులకు నోటీసులు జారీ చేసింది. ఈ కేసులో నిందితులకు ఇచ్చిన బెయిల్‌ను రద్దు చేయాలని కోరుతూ ఆంధ్రప్రదేశ్‌కు చెందిన సిఐడి విభాగం పోలీసులు సుప్రీంకోర్టులో పిటిషన్ దాఖలు చేశారు. దీనిపై సుప్రీంకోర్టు - ప్రధాన నిందితుడు రఘురామ కృష్ణరాజు, ఎంవి రమణారావు, డిప్యూటీ డైరెక్టర్ జనరల్‌, మరో ఇద్దరికి నోటీసులు జారీ చేసింది.

వివి లక్ష్మినారాయణ ఫిర్యాదు మేరకు కాల్ డేటా లీక్‌ వ్యవహారంపై సిఐడి దర్యాప్తు ప్రాంరభించింది. కొందరు స్వార్థపరులు కావాలని తన టెలిఫోన్ కాల్స్ వివరాలను లీక్ చేశారని ఆయన ఆరోపించారు. దీంతో రఘురామ రాజు, ఎంవి రమణారావు తదితరులపై సిఐడి కేసులు నమోదు చేసింది.

వాన్‌పిక్ కేసులో నిందితుడు, ప్రముఖ పారిశ్రామికవేత్త నిమ్మగడ్డ ప్రసాద్ బెయిల్ పిటిషన్‌పై విచారణను సుప్రీంకోర్టు మార్చి 4వ తేదీకి వాయిదా వేసింది. వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసులో సిబిఐ నిమ్మగడ్డ ప్రసాద్‌ను అరెస్టు చేసిన విషయం తెలిసిందే.

కర్ణాటక మాజీ మంత్రి గాలి జనార్ధన్‌రెడ్డి అనుచరుడు స్వస్తిక్‌ నాగరాజును సీబీఐ అరెస్టు చేసింది. గురువారం ఆయన్ను సిబిఐ అధికారులు అరెస్టు చేశారు. సిబిఐ కోర్టులో హాజరుపర్చారు.