కెసిఆర్ ఫోన్: టిఆర్ఎస్‌లోకే అన్న టిడిపి మాజీ మంత్రి

By Srinivas

Published: Monday, March 18, 2013, 14:14 [IST]

హైదరాబాద్: తాను త్వరలో తెలంగాణ రాష్ట్ర సమితి పార్టీలో చేరనున్నట్లు తెలుగుదేశం పార్టీ సీనియర్ నేత, మాజీ మంత్రి చంద్రశేఖర్ సోమవారం చెప్పారు. తనకు పదవులు ఇవ్వక పోవడం వల్ల పార్టీని వీడుతున్నట్లుగా వచ్చిన వార్తలను ఆయన కొట్టిపారేశారు. తాను పదవుల కోసం పార్టీని వీడటం లేదని, ఇటీవల తెలంగాణ రాష్ట్ర సమితి ప్రవేశ పెట్టిన అవిశ్వాసం తీర్మానంలో టిడిపి వైఖరి నచ్చకపోవడం వల్లే తాను పార్టీకి రాజీనామా చేస్తున్నట్లు చెప్పారు.

చంద్రశేఖర్ తన రాజీనామా లేఖను పార్టీ కార్యాలయానికి పంపించారు. ఈ సందర్భంగానే ఆయన మాట్లాడారు. తెరాసలో చేరుతానని ప్రకటించారు. తెలంగాణ రాజకీయ ఐక్య కార్యాచరణ సమితి తలపెట్టిన సడక్ బంద్ కార్యాక్రమంలో తాను పాల్గొంటానని చెప్పారు.

తెలంగాణ ప్రజల బాధలు చంద్రబాబుకు పట్టక పోవడం తనను కలచి వేసిందన్నారు. మరోవైపు తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు టిడిపికి రాజీనామా చేసిన పి.చంద్రశేఖర్‌తో ఫోన్‌లో మాట్లాడారు. పార్టీలోకి ఆహ్వానించినట్లుగా సమాచారం. ఫోన్‌లో మాట్లాడిన అనంతరం తెరాసలో చేరేందుకు పి.చంద్రశేఖర్ నిర్ణయించుకున్నట్లుగా తెలుస్తోంది.

కాగా, పి.చంద్రశేఖర్ తనకు శాసనమండలి సీటును కేటాయించక పోవడం వల్ల అలక చెంది పార్టీని వీడేందుకు సిద్ధమైనట్లుగా నిన్న వార్తలు వచ్చిన విషయం తెలిసిందే. నిన్న మాట్లాడిన ఆయన.. తాను పార్టీని వీడేందుకు ప్రత్యేక కారణాలు ఏమీ లేవంటున్నారు. తాను పార్టీ అధినేతను ఒకటి రెండు రోజుల్లో కలిసి తెలుగుదేశం పార్టీకి రాజీనామా చేస్తానన్నారు. తెలంగాణ రాష్ట్ర ఏర్పాటు కోసం తెలంగాణ రాజకీయ ఐక్య కార్యాచరణ సమితితో కలిసి పని చేయాలనే నిర్ణయానికి వచ్చినట్లుగా చెప్పారు. అయితే, ఈ రోజు మాత్రం తెరాసలో చేరుతున్నట్లు ప్రకటించారు.

Published On March 18, 2013