ఇద్దరు పిల్లలతో ఎన్నారై స్త్రీ అనుమానాస్పద మృతి

లండన్: భారత సంతతికి చెందిన ఓ మహిళ, తన ఇద్దరు కూతుళ్లతో పాటు బ్రిటన్‌లోని లండన్‌లో అనుమానాస్పద స్థితిలో మరణించింది. ఆ విషయాన్ని స్కాట్లాండ్ అధికార ప్రతినిధి ఆదివారంనాడు వెల్లడించారు. స్కూల్ లాబొరేటరీ టెక్నీషియన్‌గా పనిచేస్తున్న హీనా సోలంకి (34), ఆమె కూతుళ్లు ప్రీష్ (4), జాస్మిన్ (9) పశ్చిమ లండన్‌లోని వారి ఇంట్లో శుక్రవారం సాయంత్రం మరణించారు.

ఈ మరణాలకు కారణాలు వెంటనే తెలియరాలేదని, పోస్టుమార్టం నివేదిక కోసం ఎదురు చూస్తున్నామని స్కాట్లాండ్ యార్డ్ అధికార ప్రతినిధి చెప్పారు. అయితే, ఆ మరణాలపై పలు అనుమానాలు వ్యక్తమవుతున్నాయి. పిల్లలకు విషం ఇచ్చి చంపి ఆ తర్వాత హీనా కూడా విషం సేవించి మరణించి ఉంటుందని స్థానిక మీడియాలో వార్తలు వచ్చాయి.

మృతురాలి ఇంట్లోకి పోలీసులు రసాయన సూట్లు ధరించి ప్రవేశించడం, ఇళ్ల తలుపులను, కిటికీలను తెరవరాదని స్థానికులను ఆదేశించడం వంటివి చూస్తే విషవాయువు ప్రయోగం జరిగి ఉండవచ్చుననే అనుమానాలు వ్యక్తమవుతున్నాయి.

పోలీసులు స్యూట్‌కేసు, ట్యూబుల వంటివాటిని తీసుకుని వెళ్లినట్లు స్థానికులు చెబుతున్నారు. ఈ సంఘటన జరిగిన సమయంలో హీనా భర్త కల్పేష్ ఇంట్లో లేడు. హీనా 2002 వరకు దక్షిణ గుజరాత్ విశ్వవిద్యాలయంలో చదివినట్లు సమాచారం.

English summary

An Indian-origin school laboratory technician and her two daughters have been found dead under mysterious circumstances at their home in west London, a Scotland Yard spokesman said on Sunday.