రాష్ట్రపతికి పుస్తకాలిచ్చిన బాబు: సబిత గుండె దిటువు

By Srinivas

Published: Monday, May 20, 2013, 12:54 [IST]

న్యూఢిల్లీ/హైదరాబాద్: కళంకిత మంత్రుల వ్యవహారంపై పార్టీ అధ్యక్షుడు నారా చంద్రబాబు నాయుడు ఆధ్వర్యంలో తెలుగుదేశం పార్టీ బృందం సోమవారం మధ్యాహ్నం రాష్ట్రపతి ప్రణబ్ ముఖర్జీని కలిసింది. పార్లమెంటు సభ్యులు, శాసన సభ్యులు, శాసన మండలి సభ్యులతో కలిసి బాబు రాష్ట్రపతిని కలిశారు. రాష్ట్రంలోని కళంకిత మంత్రులపై చర్యలు తీసుకోవాలని వారు వినతి పత్రం అందించారు. తమ పార్టీ ముద్రించిన మైనింగ్ మాఫియా, రాజా ఆఫ్ కరప్షన్ పుస్తకాలను రాష్ట్రపతికి ఇచ్చినట్లు చంద్రబాబు చెప్పారు.

తేడా ఉంది: సుధీర్ రెడ్డి

కాంగ్రెసు పార్టీ అధిష్టానం ఆదేశాలను శిరసా వహిస్తానని సబితా ఇంద్రా రెడ్డి చెప్పారని ఎల్బీ నగర్ ఎమ్మెల్యే సుధీర్ రెడ్డి హైదరాబాదులో అన్నారు. కేంద్రమంత్రుల కేసుకు, రాష్ట్ర మంత్రుల కేసుకు చాలా తేడా ఉందని ఆయన ఈ సందర్భంగా అభిప్రాయపడ్డారు.

కార్యకర్తలా పని చేస్తా!: సబిత

తాను మంత్రిగా ఉండి కూడా పార్టీ కోసం కార్యకర్తలా పని చేశానని సబితా ఇంద్రా రెడ్డి తన వద్దకు వచ్చి సంఘీభావం తెలుపుతున్న నేతలు, సన్నిహితులతో చెబుతున్నట్లుగా తెలుస్తోంది. తాను ఇప్పటి వరకు పార్టీ కోసం కార్యకర్తలా పని చేశానని, ఇక ముందు కూడా అలాగే పని చేస్తానని చెప్పారు. కాంగ్రెసు బలోపేతానికి కృషి చేస్తానన్నారు. జగన్ కేసులో తాను బిజినెస్ రూల్స్ ఎక్కడా ఉల్లంఘించలేదన్నారు.

తనపై వచ్చిన ఆరోపణలను న్యాయపరంగా ఎదుర్కొంటానని ఆమె చెప్పారు. జీవితంలో తాను ఎన్నో గెలుపోటములు తాము చూశామని, ఇంద్రా రెడ్డి హయాం నుండే ఎన్నో పోరాటాలు చేశామని, భవిష్యత్తుకు ఎలాంటి ఢోకా లేదని సబితా ఇంద్రా రెడ్డి తన వర్గానికి ధైర్యం నూరిపోస్తున్నారు. సబితా రెడ్డితో డిజిపి దినేష్ రెడ్డి కూడా భేటీ అయ్యారు.

Published On May 20, 2013