జగన్ పొలిటికల్ బుకీ, పాలు పోశారు: ఆనం వివేకా

By Pratap

Published: Saturday, June 1, 2013, 15:20 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిని కాంగ్రెసు శానససభ్యుడు ఆనం వివేకానంద రెడ్డి రాజకీయ బుకీగా అభివర్ణించారు. వైయస్సార్ కాంగ్రెసు కలెక్షన్ల పార్టీ అని ఆయన శనివారం మీడియా ప్రతినిధులతో అన్నారు. విజయసాయిరెడ్డి జగన్‌కు బ్రోకర్ అని ఆయన అన్నారు. తెలంగాణ పార్లమెంటు సభ్యులు పార్టీని వీడడం ఆహ్వానించదగిన పరిణామమని ఆయన అన్నారు. ఆలస్యంగా వెళ్లినా తమ నెత్తిన తెలంగాణ ఎంపీలు పాలు పోశారని ఆయన అన్నారు. వివేకానంద రెడ్డి తమ పార్టీ అధ్యక్షుడు జగన్‌పై చేసిన వ్యాఖ్యలను వైయస్సార్ కాంగ్రెసు పార్టీ ఖండించింది. అనేక విషయాలపై వివేకం లేకుండా ఆనం వివేకానంద రెడ్డి మాట్లాడారని ఆ పార్టీ వ్యాఖ్యానించింది.

రాజ్యసభ సభ్యుడు కె. కేశవరావు కాంగ్రెసును వీడి తెరాసలోకి వెళ్లడం మ్యాచ్ ఫిక్సింగ్‌లో భాగమని ఆర్టీసి మాజీ చైర్మన్ గోనె ప్రకాశరావు అన్నారు. గెలిచిన తర్వాత పార్లమెంటు సభ్యులందరితో పాటు కేశవరావు మళ్లీ కాంగ్రెసుకు వెళ్తారని ఆయన శనివారం మీడియా ప్రతినిధులతో అన్నారు. వ్యక్తిగతంగా ప్రయోజనం పొందేందుకే కేశవరావు ఈ డ్రామా ఆడుతున్నారని ఆయన అన్నారు.

వైయస్ రాజశేఖర రెడ్డిని విమర్శించే హక్కు, అర్హత కేశవరావుకు లేదని ఆయన అన్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మాదిరిగా తెలంగాణపై పూటకో అబద్ధం చెప్పడం కెకెకు అలవాటు అని ఆయన అన్నారు. నలబై ఏళ్లుగా కాంగ్రెసులో ఉన్నానని కెకె చెప్పడం పచ్చి అబద్ధమని ఆయన అన్నారు.

కాంగ్రెసు పార్టీలో ఎన్నో కీలక పదవులు అనుభవించిన కె. కేశవ రావు పార్టీని వీడడం బాధాకరమని కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ అన్నారు. సమైక్యవాద పార్టీలకు వచ్చే ఎన్నికల్లో 270 సీట్లు వస్తాయని ఆయన శనివారం విజయవాడలో మీడియా ప్రతినిధులతో అన్నారు. ఎన్నికల సమయంలో నేతలు పార్టీలు మారడం సాధారణమని ఆయన అన్నారు.

Published On June 1, 2013