జగన్‌పార్టీని చూస్తే భయం, అమ్మో.. బతికిపోయా: ఆనం

By Srinivas

Published: Thursday, June 13, 2013, 13:13 [IST]

హైదరాబాద్: శ్రీ పొట్టి రాములు నెల్లూరు జిల్లా కాంగ్రెసు పార్టీ శాసన సభ్యుడు ఆనం వివేకానంద రెడ్డి వైయస్సార్ కాంగ్రెసు పార్టీ పైన గురువారం విమర్శలు గుప్పించారు. ఆ పార్టీ నేతల వ్యాఖ్యలపై ఆయన ఎద్దేవా చేస్తూ మాట్లాడారు. గురువారం అసెంబ్లీ సమావేశాలు ప్రారంభమైన తర్వాత ప్రతిపక్ష సభ్యుల ఆందోళనతో పలుమార్లు వాయిదా పడింది. మధ్యాహ్నం పన్నెండున్నర గంటలకు స్పీకర్ సభను శుక్రవారానికి వాయిదా వేశారు.

ఈ సందర్భంగా ఆనం మీడియాతో పిచ్చాపాటిగా మాట్లాడారు. తనకు వైయస్సార్ కాంగ్రెసు పార్టీ అంటేనే భయమేస్తోందని ఎద్దేవా చేశారు. జగన్ గురించి మాట్లాడడమెందుకు, ఆ పార్టీతో తన్నులు తినడమెందుకని ప్రశ్నించారు. వైయస్ రాజశేఖర రెడ్డి హయాంలో తనకు ఏ మంత్రి పదవి రాలేదని, అందుకే బతికిపోయానని చెప్పారు. లేదంటే జగన్ కంటే ముందే తాను జైలులో ఉండేవాడినని సెటైర్ వేశారు.

తాను చైన్ స్నాచర్లతో తన్నులు తినగలనా అన్నారు. జగన్ తన పక్కునున్న వారినే నమ్మలేడన్నారు. జగన్‌ను ఆనం పోతురాజుతో పోల్చారు. ఇప్పటికే కాళ్లు, చేతులు పడిపోయి ఓ అధికారి, మేనత్త సబితా ఇంద్రా రెడ్డి, శిష్యుడు మోపిదేవి వెంకటరమణ, సహపాటి ధర్మాన ప్రసాద రావులు బలయ్యారని, ఇంకెందరు బలి కావాలో అన్నారు. తమ సోదరుడికి వైయస్ హయాంలో మంచి పోర్టు పోలియే రాకపోవడం వల్ల బతికిపోయామన్నారు. చంద్రబాబు హయాం నుండి అసెంబ్లీ లాబీల్లో కలవడం ఆనవాయితీగా మారిందన్నారు.

గవర్నర్‌ను కలిసిన వైయస్సార్ కాంగ్రెసు ఎమ్మెల్యేలు

వైయస్సార్ కాంగ్రెసు పార్టీ ఎమ్మెల్యేలు గురువారం గవర్నర్ నరసింహన్‌ను కలిశారు. జగన్ కేసులో సిబిఐ పని తీరును తప్పుపడుతూ వారు ఫిర్యాదు చేశారు. గవర్నర్‌ను కలిసిన అనంతరం వారు మాట్లాడుతూ.. జగన్‌ను అక్రమంగా జైలులో పెట్టారని, టిడిపి, కాంగ్రెసు కుమ్మక్కయ్యాయని ఆరోపించారు. జగన్ కేసు అంశంపై న్యాయపరమైన చర్యలు తీసుకోవాలన్నారు. గవర్నర్‌ను కలిసిన వారిలో శోభా నాగి రెడ్డి, సుచరిత, బాలరాజు, పిన్నెల్లి రామకృష్ణా రెడ్డి, ధర్మాన కృష్ణ దాసు, గొల్ల బాబురావు, శ్రీకాంత్ రెడ్డి తదితరులు ఉన్నారు.

Published On June 13, 2013