లోకసభలో ప్రధాని సీట్లో కూర్చున్న సుష్మా స్వరాజ్

న్యూఢిల్లీ: ప్రతిపక్ష నేత, బిజెపి నాయకురాలు సుష్మా స్వరాజ్ మంగళవారం లోకసభలో ప్రధాని మన్మోహన్ సింగ్ సీట్లో కూర్చున్నారు. ఆమె కూర్చోవడంతో అందరూ ఒక్కసారిగా ఆశ్చర్యపోయారు. లోకసభ మొదటిసారి వాయిదా పడినప్పుడు ఉదయం 11 గంటల 15 నిమిషాల సమయంలో సుష్మా అధికార పార్టీ సభ్యుల బెంచీ వైపు వెళ్లి హోం మంత్రి సుశీల్ కుమార్ షిండే పక్కన కూర్చున్నారు. అది ప్రధాని సీటు కావడం విశేషం.

ఇటీవల శస్త్రచికిత్స చేయించుకుని తిరిగి వచ్చిన సుశీల్ కుమార్ ఆరోగ్యం గురించి ఆమె అడిగి తెలుసుకున్నారు. దాదాపు ఐదు నిమిషాల పాటు ఆమె ప్రధాని సీట్లో కూర్చున్నారు. యుపిఎ చైర్ పర్సన్, కాంగ్రెసు అధ్యక్షురాలు సోనియా గాంధీ సుశీల్ కుమార్ షిండేకు అవతలి వైపు కూర్చున్నారు.

ఆ తర్వాత ఎస్పీ నేత ములాయం సింగ్ యాదవ్, డిఎంకె నేత టిఆర్ బాలు, బిజెపి నేత మురళీ మనోహర్ జోషీ, తెలుగుదేశం పార్టీ నేత నామా నాగేశ్వర రావు, సస్పెండయిన బిఎస్పీ ఎంపి విజయ బహదూర్ సింగ్ షిండే వద్దకు వెళ్లి పలకరించారు. షిండే ఆరోగ్యం గురించి అడిగి తెలుసుకున్నారు.

72 ఏళ్ల షిండే ఈ నెల ప్రారంభంలో ముంబైలోని ఓ ప్రైవేట్ ఆస్పత్రిలో ఊపిరితిత్తులకు శస్త్రచికిత్స చేయించుకున్నారు. దీంతో ఆయన ఇప్పటి వరకు వర్షాకాలం పార్లమెంటు సమావేశాలకు దూరంగా ఉన్నారు.

English summary

Leader of the opposition Sushma Swaraj raised eyebrows on Tuesday when she sat on the Prime Minister's seat in the Lok Sabha.