వరదప్రాంతాల్లో పర్యటిస్తున్న బాలకృష్ణను చూసేందుకు నదిలోకి దూకేసిన అభిమాని.. వీడియో వైరల్!!
హిందూపురం ఎమ్మెల్యే, నటుడు బాలకృష్ణకు జనాల్లో ఉండే క్రేజ్ అంతా ఇంతా కాదు. ఓవైపు రాజకీయాలను చేస్తూ, మరోవైపు సినిమాలను చేస్తూ ఫుల్ బిజీగా ఉండే బాలకృష్ణ ఓటీటీలో సైతం అన్ స్టాపబుల్ విత్ ఎన్బీకె టాక్ షో తో సంచలనం సృష్టిస్తున్నారు. ఇక ఇంత బిజీగా ఉంటున్న బాలయ్య నియోజకవర్గంలో ప్రజల సమస్యలను తెలుసుకోవడానికి కూడా సమయాన్ని కేటాయిస్తూ ఉంటారు.
బాలయ్యను చూడటానికి ఫ్యాన్ రిస్క్
ఇటీవల ఆంధ్రప్రదేశ్ రాష్ట్రంలో కురిసిన వర్షాలతో హిందూపురం నియోజకవర్గం వరద ముంపుకు గురైంది. దీంతో హిందూపురం నియోజకవర్గం లోని వరద ప్రభావిత ప్రాంతాల్లో పర్యటించిన బాలయ్య అక్కడ ప్రజల సమస్యలను అడిగి తెలుసుకున్నారు. స్థానిక పరిస్థితులను స్వయంగా పరిశీలించారు. స్థానికులు అందరితో మాట్లాడిన బాలకృష్ణ బాధితులకు అండగా ఉంటానని, ఆదుకుంటామని హామీ ఇచ్చారు. ఇక బాలకృష్ణ ఆగ్రహంతో కొట్టినా, ఆప్యాయంగా దగ్గరకు తీసుకున్నా ఇష్టపడే అభిమానులు వరద ప్రభావిత ప్రాంతాల్లో పర్యటిస్తున్న బాలయ్యను చూడడానికి చేసిన రిస్క్ ఇప్పుడు చర్చనీయాంశంగా మారింది.
బాలకృష్ణ ను చూడటం కోసం నదిలోకి దూకేసిన అభిమాని
బాలకృష్ణని చూడడానికి ఒక అభిమాని ఏకంగా నదిలోకి దూకి ప్రాణాలు మీదకు తెచ్చుకున్న ఘటన సోషల్ మీడియాలో వైరల్ అవుతోంది. అసలేం జరిగిందంటే హిందూపురాన్ని ఆనుకుని ఉన్న చౌడేశ్వరి కాలనీ వర్షాలకు జలదిగ్బంధంలో చిక్కుకుంది. దీంతో అక్కడ పర్యటించిన ఎమ్మెల్యే బాలకృష్ణ వారందరికీ భరోసా కల్పించారు. మళ్లీ తుఫాన్ హెచ్చరిక ఉన్న నేపథ్యంలో హిందూపురం ప్రజలు ఆందోళన వ్యక్తం చేయగా వారందరికీ తాను అండగా ఉంటానని తేల్చి చెప్పారు. అక్కడి ప్రజల కష్టాలను అడిగి తెలుసుకుంటున్న క్రమంలో బాలయ్య ని చూడాలని వంతెన అవతలి గట్టుపై ఉన్న అభిమానులు, ఒక్కసారిగా నది ఇవతలి వైపు వచ్చే ప్రయత్నం చేశారు.
నదిలో కొట్టుకుపోతున్న అభిమానిని కాపాడిన స్థానికులు
వర్షాల కారణంగా వంతెన కొట్టుకుపోవడంతో, అవతలివైపు ఉన్న వారు ఇవతల వైపుకు రావాలనే ప్రయత్నం చేయగా స్థానికులు వారించారు. అయినా పట్టించుకోకుండా బాలకృష్ణ మీద అభిమానంతో ఓ అభిమాని బాలకృష్ణను చూడటం కోసం నీళ్లలోకి దూకి ఇవతలకు వచ్చే ప్రయత్నం చేశారు. కానీ నీటి ప్రవాహం ఉదృతంగా ఉండడంతో కొట్టుకుపోయాడు. దీంతో అక్కడ ఉన్న వారంతా ఒక్కసారిగా షాక్ కు గురయ్యారు. చివరకు సదరు అభిమానిని వేరే చోట ఉన్న కొందరు కాపాడి బయటకు తీశారు. ఇదేం పని అని అతని మీద ఆగ్రహం వ్యక్తం చేశారు.
సోషల్ మీడియాలో వీడియో వైరల్.. నెటిజన్ ల స్పందన ఇలా
ప్రస్తుతం ఈ వీడియో సోషల్ మీడియాలో వైరల్ అవుతుంది. దీంతో అభిమాన హీరోల కోసం రిస్కు చేయవచ్చు కానీ, ఇలా ప్రాణాల మీదకు తెచ్చుకోవటం మంచిదికాదని ఈ వీడియో చూసిన ప్రతి ఒక్కరు స్పందిస్తున్నారు. నదిలో కొట్టుకుపోయి ప్రాణాలు పోతే అతని కుటుంబం పరిస్థితి ఏమిటి అనేది ఆలోచించాలని అంటున్నారు. ఇక బాలయ్య మీద అభిమానం అంటే ఇట్లానే ఉంటుందని మరికొందరు స్పందిస్తున్నారు.