బిజెపి నాయకుడు బంగారు లక్ష్మణ్ కన్నుమూత

హైదరాబాద్: భారతీయ జనతా పార్టీ (బిజెపి) సీనియర్ నాయకుడు, పార్టీ మాజీ జాతీయాధ్యక్షుడు బంగారు లక్ష్మణ్ కన్ను మూశారు. సికింద్రాబాదులోని యశోదా ఆస్పత్రిలో చికిత్స పొందుతూ ఆయన శనివారంనాడు తుదిశ్వాస విడిచారు. 1939లో జన్మించిన బంగారు లక్ష్మణ్ 2000 - 2001 మధ్య కాలంలో బిజెపి జాతీయాధ్యక్షుడిగా పనిచేశారు.

కేంద్ర ప్రభుత్వంలో 1999 నుంచి 2000 వరకు రైల్వే శాఖ సహాయ మంత్రిగా పనిచేశారు. రక్షణ కొనుగోళ్ల కుంభకోణంలో ఆయనకు నాలుగేళ్ల పాటు జైలు శిక్ష పడింది. ఆంధ్రప్రదేశ్‌లోని మాదిగ కుటుంబంలో పుట్టిన ఆయన రాజకీయాల్లో అంచెలంచెలుగా ఎదిగారు.

ఆయన బిఎ, ఎల్ఎల్‌బి హైదరాబాదులో పూర్తి చేశారు. ఆయన భార్య సుశీలా లక్ష్మణ్ 14వ లోకసభలో సభ్యురాలిగా ఉన్నారు. ఆమె రాజస్థాన్‌లోని జాలోర్ నియోజక వర్గం నుంచి లోకసభకు ఎన్నికయ్యారు. ఆయనకు కుమారుడు, ముగ్గురు కూతుళ్లు ఉన్నారు.

చిన్న వయస్సులోనే ఆయన రాజకీయాల పట్ల ఆసక్తి ప్రదర్శించారు. అత్యవసర పరిస్థితి కాలంలో ఆయన జైలు జీవితం గడిపారు. బంగారు లక్ష్మణ్ 1996లో రాజ్యసభకు ఎన్నికయ్యారు. బంగారు లక్ష్మణ్ మృతికి బిజెపి సీనియర్ నేత ఎం. వెంకయ్య నాయుడు సంతాపం వ్యక్తం చేశారు.

English summary

BJP senior leader Bangaru Laxman has passed away in Secendurabad Yasoda hospital with illhealth.