టీటీడీ పాలక మండలి సిద్దం, ఆ ఎమ్మెల్యేలకు ఛాన్స్ - తుది జాబితాలో..!!!

Tirumala: ప్రతిష్ఠాత్మక తిరుమల తిరుపతి దేవస్థానం బోర్డు ప్రకటనకు రంగం సిద్దమైంది. ఎన్నికల వేళ ఈ జాబితా రూపకల్పన పైన ఆసక్తి నెలకొంది. ఏపీతో పాటుగా తెలంగాణ, తమిళనాడు, కర్ణాటక, మహారాష్ట్ర నుంచి అవకాశం కల్పిస్తున్నారు. ఎనిమిది మంది ఎమ్మెల్యేతో పాటుగా ముగ్గురు ఎక్స్ అఫీషియో సభ్యులతో పాటుగా మొత్తంగా 27 మందితో బోర్డు ఏర్పాటు చేస్తున్నట్లు తెలుస్తోంది. బోర్డులో పారిశ్రామిక వేత్తలకు అవకాశం కల్పిస్తున్నట్లు సమాచారం.

టీటీడీ పాలక మండలి సభ్యులుగా: తిరుమల పాలక మండలి నియామకం పూర్తయింది. అధికారికంగా ప్రకటనే మిగిలింది. ఎన్నికల వేళ సీఎం జగన్ అన్ని రకాల సమీకరణాలు పరిగణలోకి తీసుకొని బోర్డుకు తుది రూపు ఇచ్చినట్లు తెలుస్తోంది. ఎక్కడా విమర్శలకు తావు లేకుండా సభ్యుల ఎంపిక చేసినట్లు సమాచారం. బోర్డులో ఈవో, దేవాదాయ శాఖ ముఖ్య కార్యదర్శి, తుడా ఛైర్మన్ ఎక్స్ అఫీషియో సభ్యులుగా మొత్తం 27 మందితో ఈ బోర్డు ఏర్పాటు చేస్తున్నట్లు తెలుస్తోంది.

అందులో తెలంగాణ నుంచి నలుగురు, తమిళనాడు- కర్ణాటక నుంచి ఇద్దరు చొప్పున, మహారాష్ట్ర నుంచి ముగ్గురికి అవకాశం ఇచ్చినట్లు చెబుతున్నారు. ఏపీలోని 8 మంది ఎమ్మెల్యేలు, ధార్మిక సంస్థలకు చెందిన వారికి అవకాశం ఇస్తున్నట్లు సమాచారం.

ఎన్నికల వేళ ఆసక్తిగా: ఎన్నికల్లో సీట్ల అంశం కూడా టీటీడీ బోర్డులో ఎమ్మెల్యేకు అవకాశం కల్పించటంలో ప్రామాణికంగా మారుతోంది. ఎమ్మెల్యేలు పేర్ని నాని, ద్వారంపూడి చంద్రశేఖ రెడ్డి, జోగారావు, పల్నాడు జిల్లా నుంచి తాజాగా వార్తల్లో నిలిచిన ఒక ఎమ్మెల్యే, టీటీడీ బోర్డు మాజీ అధ్యక్షుడు సతీమణి, కర్నూలు జిల్లాలో కీలక నేత పేర్లు దాదాపు ఖరారయ్యాయి.

నెల్లూరు నుంచి ఎంపీ కుటుంబానికి మరోసారి అవకాశం ఇవ్వనున్నట్లు తెలుస్తోంది. అదే విధంగా గోదావరి జిల్లాల నుంచి కాపు, శెట్టి బలిజ నేతలకు ప్రాధాన్యత కల్పించారు. భీమవరం కు చెందిన సుబ్బారాజు పేరు ఖరారైనట్లు తెలుస్తోంది. రంగమ్మ పేరును ఓకే చేసారని సమాచారం. అనంతపురం జిల్లా నుంచి ఒక సీనియర్ ఎమ్మెల్యే పేరుకు ఆమోదం తెలిపారని విశ్వసనీయ సమాచారం.

బోర్డుకు తుది రూపు: ఇదే సమయంలో తెలంగాణ నుంచి ముగ్గురు పేర్లు ఖరారయ్యని తెలుస్తోంది. అందులో ఒకరు సీనియర్ ఎమ్మెల్యేగా కాగా, మరొకరు ఫార్మా సంస్థల అధినేత యంయస్ఎన్ రెడ్డి పేరు ఖరారైందని సమాచారం. కర్ణాటక నుంచి సీఎం సిద్దరామయ్య సిఫార్సు మేరకు దేశ్ పాండే, బీజేపీ ఎమ్మెల్యే విశ్వనాద్ పేర్లు ఖరారయ్యారని చెబుతున్నారు. అదే విధంగా తమిళనాడు నుంచి సీఎం స్టాలిన్ సిఫార్సు మేరకు తిరుపూర్ బాలా పేరు ఫైనల్ అయింది.

మహారాష్ట్ర నుంచి ఒక ప్రముఖ పారిశ్రామిక వేత్త సిఫార్సుకు ఆమోదం చెప్పినట్లు సమాచారం. మరో ఇద్దరి పేర్లు మహారాష్ట్ర నుంచి పరిశీలనలో ఉన్నాయి. తుడా ఛైర్మన్ హోదాలో చెవిరెడ్డి భాస్కర రెడ్డి ఎక్స్ అఫీషియో సభ్యుడిగా కొనసాగనున్నారు. ఈ సాయంత్రం అధికారికంగా జాబితా విడుదలయ్యే అవకాశం కనిపిస్తోంది.

English summary

CM Jagan Almost Finalised the new Board for TTD with 24 members form three states, Official orders to be issued.