ఈ నెల 20 నుంచి ఏపీలో.. !!

Chandrababu Naidu: విశాఖ జిల్లా స్థానిక సంస్థల ఎమ్మెల్సీ మినహా ప్రస్తుతం రాష్ట్రంలో ఎన్నికల వాతావరణం ఏదీ లేదు. రెండు నెలల కిందటే ఈ ప్రక్రియ మొత్తం ముగిసింది. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్ సారథ్యంలో రాష్ట్రంలో తెలుగుదేశం- జనసేన- భారతీయ జనతా పార్టీ సంకీర్ణ కూటమి ప్రభుత్వం ఏర్పడి రెండు నెలలవుతోంది.

జూన్ 12వ తేదీన చంద్రబాబు ముఖ్యమంత్రిగా ప్రమాణ స్వీకారం చేసిన విషయం తెలిసిందే. ఆయనతో పాటు మొత్తం కేబినెట్ మంత్రులు ప్రమాణ స్వీకారం చేశారు. ఈ రెండు నెలల వ్యవధిలో చంద్రబాబు ప్రభుత్వం ఎదుర్కొనబోతోన్న తొలి ఎన్నిక.. విశాఖ జిల్లా స్థానిక సంస్థల ఎమ్మెల్సీదే.

వైఎస్ఆర్ కాంగ్రెస్ పార్టీ తరఫున మాజీ మంత్రి బొత్స సత్యనారాయణ పోటీలో నిలిచారు. టీడీపీ- జనసేన- బీజేపీ సంకీర్ణ కూటమి ప్రభుత్వం.. ఇంకా తమ అభ్యర్థిని ఖరారు చేయాల్సి ఉంది. నామినేషన్లను దాఖలు చేయడానికి చివరి తేదీ.. ఈ నెల 13. బొత్స సత్యనారాయణ సోమవారం నామినేషన్ దాఖలు చేయనున్నట్లు వైఎస్ఆర్సీపీ వెల్లడించింది.

ఈ పరిస్థితుల్లో కేంద్ర ఎన్నికల కమిషన్ అధికారులు రాష్ట్రంలో కొత్త ఓటర్ల నమోదు కార్యక్రమాన్ని చేపట్టడం ప్రాధాన్యతను సంతరించుకుంది. దీనికి అవసరమైన అన్ని ఏర్పాట్లును శరవేగంగా పూర్తి చేస్తోంది. ఈ నెల 20వ తేదీన ఈ కార్యక్రమానికి శ్రీకారం చుట్టనున్నట్లు తెలుస్తోంది.

సుమారు రెండు నెలల పాటు అంటే అక్టోబర్ 18వ తేదీ వరకు కొత్త ఓటర్ల నమోదు కార్యక్రమం కొనసాగే అవకాశం ఉంది. ఈ నెల 20వ తేదీన బూత్ స్థాయి అధికారులు ఇంటింటి సర్వేను చేపట్టనున్నారు. అక్టోబర్ 18వ తేదీ నాటికి ప్రక్రియను పూర్తి చేస్తారని, అదే నెల 29వ తేదీన ఓటర్ల ముసాయిదా జాబితా విడుదల చేస్తారని సమాచారం.

ఆ తరువాత మరో నెల రోజుల పాటు అంటే నవంబర్ 28వ తేదీ వరకు అభ్యంతరాలు స్వీకరిస్తారు. వచ్చే ఏడాది జనవరి 6వ తేదీన తుది ఓటర్ల జాబితా ప్రకటిస్తారని తెలుస్తోంది. జనవరి 6వ తేదీన తుది జాబితా ప్రకటించాల్సి ఉన్నందున.. ఆ లోగా 18 ఏళ్లు నిండేవారు కూడా ఇప్పుడే ఓటరు జాబితాలో తమ పేర్లను నమోదు చేసుకునే అవకాశం కల్పించింది ఈసీ.

English summary

Election Commission of India likely to register new voters in Andhra Pradesh from August 20.