జగన్ కేసులో సమన్లు: గీతారెడ్డి రాజీనామా తప్పదా?

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఆస్తుల కేసుకు సంబంధించి లేపాక్షి నాలెడ్జ్ హబ్‌లో మంత్రి గీతా రెడ్డికి సమన్లు జారీ చేయడంతో ఆమె తప్పుకోక తప్పని పరిస్థితి ఏర్పడిందా? అంటే అవుననే వాదనలు వినిపిస్తున్నాయి. గురువారం సిబిఐ కోర్టు లేపాక్షి కేసును పరిగణనలోకి తీసుకోవడంతో మంత్రి పదవి నుంచి గీతారెడ్డి తప్పుకోవాల్సిన పరిస్థితి నెలకొందంటున్నారు.

గతంలో మంత్రి పదవికి ధర్మాన ప్రసాద రావు రాజీనామా చేసినప్పుడు ఆయన కేసును సిబిఐ కోర్టు విచారణకు పరిగణనలోకి తీసుకున్నాకే ముఖ్యమంత్రి దానిని ఆమోదించారు. ఇప్పుడు గీతారెడ్డి విషయంలోనూ అదే విధానాన్ని అమలు చేసే అవకాశం లేకపోలేదంటున్నారు.

లేపాక్షి నాలెడ్జ్ హబ్‌పై సిబిఐ దాఖలు చేసిన చార్జిషీట్‌ను కోర్టు పరిగణనలోకి తీసుకోవడం, కోర్టు గీతారెడ్డికి సమన్లు జారీ చేయడంతో ఆమె రాజీనామా వ్యవహారం చర్చకు వస్తోంది. సిబిఐ చార్జ్‌షీట్ దాఖలు చేసిన రోజే గీతారెడ్డి ముఖ్యమంత్రి క్యాంపు కార్యాలయంలో కిరణ్‌ను కలిసి తాను రాజీనామా చేస్తానని చెప్పారు. అయితే అప్పుడే తొందర పడవద్దంటూ కిరణ్ ఆమెకు హితవు పలికారు. కేసును కోర్టు కాగ్నిజెన్స్‌లోకి తీసుకునేంత వరకూ ఓపిక పట్టాలని సూచించారు.

కాగా, వైయస్ జగన్ ఆస్తుల కేసులో లేపాక్షి నాలెడ్జ్ హబ్ వ్యవహారానికి సంబంధించి నిందితులకు సిబిఐ కోర్టు గురువారం సమన్లు జారీ చేసిన విషయం తెలిసిందే. వైయస్ జగన్, మంత్రి గీతారెడ్డి, మాజీ మంత్రి ధర్మాన ప్రసాద రావుతో పాటు 14 మంది నిందితులకు సిబిఐ కోర్టు సమన్లు జారీ చేసింది. నవంబర్ 15వ తేదీన తమ ముందు హాజరు కావాలని కోర్టు ఆదేశించింది. దీంతో వైయస్ జగన్ ఆస్తుల కేసులో గీతారెడ్డి తొలిసారి కోర్టు మెట్లు ఎక్కబోతున్నారు.

English summary

Minister Geetha Reddy, three IAS officers, and 10 others were summoned by the Principal Special Court for CBI Cases here on Thursday to appear before it on November 15 in the Lepakshi Knowledge Hub aspect of the quid pro quo investments case.