జగన్ పార్టీ ఎంపీ కొత్తపల్లి గీతకు అభ్యంతరకర సందేశాలు

విశాఖ: ఆంధ్రప్రదేశ్ ముఖ్యమంత్రి నారా చంద్రబాబు నాయుడును కలిసిన అనంతరం వైయస్సార్ కాంగ్రెసు పార్టీ మహిళా నాయకురాలు, అరకు పార్లమెంటు సభ్యురాలు కొత్తపల్లి గీతకు ఫేస్‌బుక్‌లో అభ్యంతరకర సందేశాలు వస్తున్నాయట. ఇటీవల ఆమె ఏపీ మంత్రులను, సీఎంను కలిసిన విషయం తెలిసిందే. దీంతో ఆమె టీడీపీలోకి వెళ్తారనే ప్రచారం జోరుగా సాగుతోంది.

ఇదిలా ఉండగా.. బాబును కలిసిన అనంతరం తనకు మానసిక వేధింపులు ఆరంభమయ్యాయని ఆమె అరకు పోలీసులకు ఫిర్యాదు చేసినట్లుగా తెలుస్తోంది. అరకులో ఓ మీడియా ప్రతినిధితో మాట్లాడుతూ.. ముఖ్యమంత్రిని అరకు సమస్యలపై కలిసిన అనంతరం తనకు ఫోన్లో బెదిరింపులు వస్తున్నాయన్నారు.

తాను కాక మరెవరైనా ఫోన్ అటెండ్ చేస్తే కనుక మౌనమే సమాధానం అవుతోందన్నారు. అలాగే తన ఫేస్‌బుక్ అకౌంట్‌లో అసభ్యకరమైన సందేశాలు పోస్టు చేస్తున్నారని ఆవేదన వ్యక్తం చేశారు. ఫిర్యాదు స్వీకరించిన పోలీసులు సైబర్ క్రైమ్ కింద కేసు నమోదు చేశారు.

English summary

Offensive messages to MP Kothapalli Geetha's facebook page.