జోష్‌తో వెళ్లి అనంత విషాదంతో ఇలా... (పిక్చర్స్)

By Pratap

Published: Tuesday, June 10, 2014, 12:43 [IST]

హైదరాబాద్: విజ్ఞాన యాత్రకు వెళ్లే ముందు విద్యార్థులు ఇంతటి పెను విషాదం చుట్టుముడుతుందని ఊహించి ఉండరు. విజ్ఞాన యాత్ర విషాదయాత్రగా మారుతుందని కలలో కూడా కనిపెట్టి ఉండరు. పొంచి ఉన్న ముప్పు ఎవరికి మాత్రం తడుతుంది. ఉల్లాసంగా, ఉత్సాహంగా విజ్ఞాన యాత్రకు వెళ్లిన విద్యార్థులను కొంత మంది బియాస్ నది ముంచేసింది.

తమతో నిన్నమొన్నటి వరకు కలిసి ఉన్నవారు తమతో ఉంటూనే తమకు కాకుండా పోయారనే విషాదాన్ని బతికి ఉన్న విద్యార్థులు తట్టుకోవడం కష్టమే. ఆ విషాదం కట్టెదుట దయ్యంలా నెత్తి విరబోసుకుని నిలబెడితే వారి పరిస్థితి ఎలా ఉంటుంది..

ఆదివాంనాడు హిమాచల్ ప్రదేశ్‌లోని బియాస్ నదిలో 24 మంది విద్యార్థులు గల్లంతయ్యారు. వారిలో నలుగురి మృతదేహాలు దొరికాయి. ఆ మృతదేహాలతో పాటు కొంత మంది విద్యార్థులు సోమవారం రాత్రి హైదరాబాదు శంషాబాద్ విమానాశ్రయానికి చేరుకున్నారు. ఆ దృశ్యాలు మనసును కలిచివేస్తున్నాయి.

కళ్ల ముందే మాయమైతే...

తమతో పాటు ఆడుతూ పాడుతూ తుళ్లుతూ తిరిగిన సహ విద్యార్థులు ఇక లేరని తలుచుకున్నప్పుడు శోకం దీప్తిని ముంచెత్తినట్లుగానే ఉంటుంది.

కుటుంబ సభ్యులకు ఊరట..

అనంత శోకాన్ని తన కుటుంబ సభ్యులతో పంచుకుంటున్న విద్యార్థిని దీప్తి. ఆమె కుటుంబ సభ్యులకు తమ అమ్మాయి బతికి ఉన్నందుకు ఊరట..

ఇలా ఓ విద్యార్థిని...

ప్రమాదం నుంచి కొన్ని నిమిషాలు ఆలస్యంగా చేరుకోవడం వల్ల బయటపడినవారిలో ఈ అమ్మాయి ఉంది. శంషాబాద్ విమానాశ్రయం చేరుకున్న ఆ విద్యార్థిని గుండెలో విషాదం గూడు కట్టుకుంది.