విశాఖ నుంచి హైదరాబాద్, తిరుపతి వెళ్లే ప్రధాన రైళ్లు ఈ తేదీల్లో రద్దు..!!

రైల్వే అధికారులు కీలక అప్డేట్ ఇచ్చారు. విశాఖ నుంచి తిరుపతి, లింగంపల్లి వెళ్లే వాటితో సహా పలు ప్రాంతాలకు వెళ్లే రైళ్లను తాత్కాలికంగా రద్దు చేసినట్లు అధికారులు ప్రకటించారు. ఈ మేరకు రైళ్ల వివరాలు.. రద్దు చేస్తున్న తేదీలను వెల్లడించారు. రైల్వే ఆధునీకరణ పనుల నిమిత్తం ఈ నిర్ణయం తీసుకున్నట్లు వివరించారు. ఈ మేరకు ప్రయాణీకులు ఏర్పాట్లు చేసుకోవాలని రైల్వే అధికారులు కోరుతున్నారు. అయితే, విశాఖ నుంచి నిత్యం రద్దీగా ఉండే రైళ్లు సైతం ఈ రద్దు చేసిన జాబితాలో ఉన్నాయి.

దక్షిణ మధ్య రైల్వే పరిధిలో గోదావరి-రాజమండ్రి, రాజమండ్రి-కడియం సెక్షన్లలో ఆధునికీకరణ నిర్మాణ పనులు చేపట్టనున్న నేపథ్యంలో జనవరిలో పలు రైళ్లను తాత్కాలికంగా రద్దు చేస్తున్నట్లు వాల్తేరు రైల్వే అధికారులు వెల్లడించారు. జనవరి 27న తిరుపతి-పూరి ఎక్స్‌ప్రెస్‌ (17480), 28న పూరి-తిరుపతి (17479), తిరుపతి-విశాఖ డబుల్‌ డెక్కర్‌ (22708); 28, 29 తేదీల్లో విశాఖ-లింగంపల్లి జన్మభూమి ఎక్స్‌ప్రెస్‌ (12805), మచిలిపట్నం-విశాఖ ఎక్స్‌ప్రెస్‌ (17219); 29న విశాఖ-తిరుపతి డబుల్‌ డెక్కర్‌ (22707), 29, 30 తేదీల్లో లింగంపల్లి-విశాఖ జన్మభూమి ఎక్స్‌ప్రెస్‌ (12806), విశాఖ-మచిలీపట్నం ఎక్స్‌ప్రెస్‌ (17220), 28, 30 తేదీల్లో గుంటూరు-విశాఖ సింహాద్రి ఎక్స్‌ప్రెస్‌ (17239) రద్దు చేసారు.

కాగా. 29, 31 తేదీల్లో విజయవాడ-విశాఖపట్నం రత్నాచల్‌ ఎక్స్‌ప్రెస్‌ (12718), విశాఖ పట్నం-విజయవాడ రత్నాచల్‌ ఎక్స్‌ప్రెస్‌ (12717), విశాఖ-గుంటూరు సింహాద్రి ఎక్స్‌ప్రెస్‌ (17240), రాజమండ్రి-విశాఖ మెము పాసింజర్‌ (67285), విశాఖ-రాజమండ్రి మెము పాసింజర్‌ (67286), జనవరి 31న గుంటూరు-విశాఖ డబుల్‌ డెక్కర్‌ ఉదయ్‌ ఎక్స్‌ప్రెస్‌ (22876), విశాఖ-గుంటూరు డబుల్‌ డెక్కర్‌ ఉదయ్‌ ఎక్స్‌ప్రెస్‌ (22575) రద్దు కానున్నట్టు పేర్కొన్నారు. ప్రయాణీకులు ఈ మార్పులకు అనుగుణంగా ప్రయాణాలు ఖరారు చేసుకోవాలని సూచించారు. విశాఖ నుంచి నిత్యం రద్దీగా ఉండే రైళ్లు కావటంతో ప్రయాణీకులకు సమస్యలు ఎదురయ్యే అవకాశం కనిపిస్తోంది.

English summary

Walter railway officials announces many major trains cancelled for three days from Visakha in Rajahmundry route