పండుగ వేళ ప్రకాశం జిల్లాలో విషాదం..
సంక్రాంతి పండుగను ఆంధ్రప్రదేశ్ లోని ప్రకాశం జిల్లా మార్కాపురం జిల్లాలో ఘోర విషాదం చోటు చేసుకుంది. అతివేగంగా దూసుకొచ్చిన కారు.. ద్విచక్ర వాహనాన్ని బలంగా ఢీకొనడంతో బైక్పై ప్రయాణిస్తున్న వ్యక్తి అక్కడికక్కడే మృతి చెందాడు. ఈ దుర్ఘటనలో మరో ఇద్దరు తీవ్రగాయాల పాలవడంతో ఆసుపత్రికి తరలించి చికిత్స అందిస్తున్నారు. ఈ ప్రమాదంతో స్థానికంగా విషాద ఛాయలు అలుముకున్నాయి.
అసలేం జరిగిందంటే..
బేస్తవారిపేటలో సోమవారం రాత్రి ఘోర రోడ్డు ప్రమాదం చోటుచేసుకున్నట్టు తెలుస్తోంది. ప్రమాదం జరిగిన సమయంలో ద్విచక్ర వాహనంపై ముగ్గురు ప్రయాణిస్తుండగా.. కారు బలంగా ఢీకొనడంతో బైక్ పూర్తిగా ధ్వంసమై.. ఒకరు అక్కడికక్కడే ప్రాణాలు కోల్పోయారు. కారును డ్రైవర్ అధిక వేగంతో, అజాగ్రత్తగా నడపడం వల్లే ఈ దుర్ఘటన చోటుచేసుకుందని పోలీసులు ప్రాథమికంగా నిర్ధారించారు. ప్రమాదంలో తీవ్రంగా గాయపడిన మరో ఇద్దరిని స్థానికులు, పోలీసులు కలిసి హుటాహుటిన సమీప ఆసుపత్రికి తరలించారు.
వైద్యుల సమాచారం ప్రకారం వారిలో ఒకరి పరిస్థితి విషమంగా ఉండటంతో మెరుగైన చికిత్స కోసం ఉన్నత ఆసుపత్రికి రిఫర్ చేసినట్లు తెలుస్తోంది. మరో వ్యక్తి పరిస్థితి నిలకడగా ఉన్నట్లు వైద్యులు వెల్లడించారు. ప్రమాద సమాచారంతో బేస్తవారిపేట పోలీసులు వెంటనే సంఘటనా స్థలానికి చేరుకుని సహాయక చర్యలు చేపట్టారు. రహదారిపై ట్రాఫిక్కు అంతరాయం కలగకుండా చర్యలు తీసుకున్నారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు.
ఈ ఘటనపై పోలీసులు కేసు నమోదు చేసి దర్యాప్తు ప్రారంభించారు. కారు డ్రైవర్ను అదుపులోకి తీసుకుని విచారిస్తున్నట్లు సమాచారం. ప్రమాదానికి కారణమైన వాహనాన్ని స్వాధీనం చేసుకుని సాంకేతిక ఆధారాలు సేకరిస్తున్నారు. మృతుడి కుటుంబ సభ్యులకు సమాచారం అందించి, వారి ఫిర్యాదు ఆధారంగా తదుపరి చర్యలు చేపడుతున్నారు. బేస్తవారిపేట పరిసర ప్రాంతాల్లో ఇటీవలి కాలంలో రోడ్డు ప్రమాదాలు పెరుగుతున్నాయని స్థానికులు ఆందోళన వ్యక్తం చేస్తున్నారు. సరైన స్పీడ్ బ్రేకర్లు లేకపోవడం, రహదారి మలుపుల వద్ద హెచ్చరిక బోర్డులు లేకపోవడం కూడా ప్రమాదాలకు కారణమవుతున్నాయని వారు అంటున్నారు.
వాహనదారులకు పోలీసుల హెచ్చరిక..
ఈ ఘటన నేపథ్యంలో పోలీసులు వాహనదారులకు కీలక సూచనలు చేశారు. ద్విచక్ర వాహనదారులు తప్పనిసరిగా హెల్మెట్ ధరించాలని, నాలుగు చక్రాల వాహనాలు వేగ నియంత్రణ పాటించాలని సూచించారు. ముఖ్యంగా మూల మలుపులు, జంక్షన్ల వద్ద వేగం తగ్గించి అప్రమత్తంగా వ్యవహరించాలని విజ్ఞప్తి చేశారు. అజాగ్రత్త డ్రైవింగ్ వల్ల విలువైన ప్రాణాలు కోల్పోతున్నారని, ప్రతి ఒక్కరూ బాధ్యతాయుతంగా వాహనాలు నడపాలని పోలీసులు హెచ్చరించారు.
Click it and Unblock the Notifications
Sign in with Google