Video:అమ్మ నీకోసం నేనిక్కడే ఉన్నా.. కదిలించే కన్నీటి ప్రేమ కథ..

మానవ సంబంధాలన్నీ ఆర్థిక సంబంధాలుగా మారిన ప్రస్తుత తరుణంలో అటువంటివాటికి తాము దూరమని, ప్రేమ, విశ్వాసానికే తమ మొదటి ప్రాధాన్యమని ఓ శునకం మరోసారి నిరూపించింది. తన కళ్లముందే వంతెన పైనుంచి దూకి ఆత్మహత్య చేసుకున్న యజమాని తిరిగివస్తుందనే ఆశతో అక్కడే గంటల తరబడి ఎదురు చూసింది. ఎంతకీ రాకపోవడంతో ఆ యజమాని అక్కడ వదిలిన చెప్పుల దగ్గరే ఆవాసాన్ని ఏర్పాటు చేసుకుంది. వంతెనవైపు చూస్తూ చెప్పుల దగ్గర అరుస్తూ ఉన్న శునకాన్ని చూసిన స్థానికులు అప్రమత్తమయ్యారు.

యానాం ఫెర్రీ రోడ్ లో నివాసముంటున్న మందాగి కాంచన యానాం-ఎదుర్లంక బాలయోగి వారధిపై నుంచి గోదావరిలో దూకి ఆత్మహత్య చేసుకుంది. ఇంటిదగ్గర నుంచి తనతోపాటు వచ్చిన శునకాన్ని అక్కడే వదిలేసింది. గోదావరిలోకి దూకిన తర్వాత తన యజమాని కనిపించకపోవడంతో ఆ శునకం ఎదురుచూపులు చూస్తూ అక్కడే ఉండిపోయింది. ఆ యువతి విడిచిన చెప్పుల దగ్గరే అరుస్తుండటంతో స్థానికులు అప్రమత్తమయ్యారు. పోలీసులతో కలిసి గోదావరిలో గాలింపు చర్యలు చేపట్టి మృతదేహాన్ని వెలికితీశారు. ఆ యువతికి సంబంధించిన కుటుంబ సభ్యులు వచ్చి ఆ శునకాన్ని తీసుకువెళ్లేవరకు అది అక్కడే ఉండిపోయింది.

యానాం:గోదావరిలోకి దూకి యువతి ఆత్మహత్య..యువతి కోసం ఎదురు చూస్తున్న పెంపుడు కుక్క#GodavariRiver #AndhraPradesh #Oneindiatelugu pic.twitter.com/09X162M8u8

— oneindiatelugu (@oneindiatelugu) July 18, 2023

యజమానిపట్ల ఆ కుక్క చూపించిన విశ్వాసం మనుషుల్లోని మానవత్వానికి సవాల్ గా మారిందనే అభిప్రాయం వ్యక్తమవుతోంది. గతంలో కూడా ఈ తరహా సంఘటనలు రెండు చోటుచేసుకున్నాయి. డబ్బుల కోసం, ఆస్తి కోసం కుటుంబ సభ్యులే ఒకరినొకరు హత్య చేసుకుంటున్న ప్రస్తుత తరుణంలో ప్రేమ, విశ్వాసమే శ్వాసగా చూపిస్తూ తన యజమాని కోసం ఎదురు చూసిన ఆ శునకం మానవాళికి పాఠం నేర్పుతోంది.

English summary

A dog has once again proved that in the present moment when all human relations have become economic relations, they are far from such things and their first priority is love and trust.