సాయిబాబా ఆలయానికి లక్షల విరాళం.. విజయవాడలో యాచకుడి దాతృత్వం!!

ఆంధ్రప్రదేశ్ రాష్ట్రంలో ఇప్పుడు ఒక యాచకుడు సాయిబాబా ఆలయ అభివృద్ధి కోసం అందిస్తున్న విరాళాల వ్యవహారం ఆసక్తికరంగా మారింది . తాజాగా విజయవాడ సాయిబాబా మందిర అభివృద్ధికి ఓ యాచకుడు లక్ష రూపాయల విరాళం అందించారు . ఇప్పటివరకు ఆ యాచకుడు ఆలయానికి అందించిన విరాళం అక్షరాల 9 లక్షల 54 వేల రూపాయలు.

ఇక ఈ కథనం వివరాల్లోకి వెళితే ఎన్టీఆర్ జిల్లా విజయవాడ ముత్యాలంపాడు లోని శ్రీ షిరిడి సాయిబాబా మందిరం వద్ద యాదిరెడ్డి అనే ఒక యాచకుడు భిక్షాటన చేసి జీవనం సాగిస్తున్నాడు. భక్తుల నుంచి తాను సేకరించిన డబ్బులతో ఆలయాల అభివృద్ధికి విరాళాలు అందజేస్తున్నాడు.

తాజాగా భక్తుల నుంచి సేకరించిన సొమ్ముతో లక్ష రూపాయలు జమ చేసి ముత్యాలంపాడు లోని షిరిడి సాయిబాబా మందిర అభివృద్ధికి అందించారు. ఈ డబ్బును ఆలయ గౌరవాధ్యక్షుడు డాక్టర్ పూనూరు గౌతమ్ రెడ్డికి యాచకుడు అందజేశాడు. అయితే ఇది ఆలయానికి మొదటిసారిగా యాచకుడు ఇచ్చిన విరాళం కాదు.

ప్రస్తుతమిచ్చిన డబ్బులే కాకుండా వివిధ సందర్భాలలో 8 లక్షల 54 వేల 691 రూపాయలు విరాళంగా అందజేశారని సాయిబాబా మందిర గౌరవాధ్యక్షుడు గౌతమ్ రెడ్డి వెల్లడించారు. ఇక తాను సాయిబాబా మందిరానికి విరాళం ఇవ్వడం పైన మాట్లాడిన యాదిరెడ్డి బాబా మందిరం వద్ద తన భిక్షాటన ద్వారా సంపాదించిన డబ్బు తిరిగి బాబాకే ఇవ్వడం తనకు చాలా సంతోషంగా ఉందన్నారు.

ఇకపై తాను సంపాదించే ప్రతి రూపాయి కూడా దైవకార్యాలకు ఉపయోగిస్తానని ఆయన చెబుతున్నారు . ఆలయ అభివృద్ధికి యాచించిన డబ్బును విరాళంగా ఇచ్చిన యాచకుడు యాదిరెడ్డిని ఆలయ గౌరవ అధ్యక్షుడు గౌతమ్ రెడ్డి బాబా వారి శేష వస్త్రంతో సత్కరించారు.వేల కట్ల రూపాయలు ఉన్నా దైవ కార్యాలకు డబ్బు ఖర్చుపెట్టని వారు ఎంతో మంది ఉన్నారు. కానీ యాచన చేసిన డబ్బును దైవ కార్యానికి ఖర్చు పెడుతున్న యాచకుడు గ్రేట్ అంటున్నారు ఈ విషయం తెలిసిన వాళ్ళు.

English summary

A beggar donated one lakh rupees for the development of Vijayawada Sai Baba Mandir. So far the beggar's donation to the temple is 9 lakh 54 thousand rupees.