Rupee: రూపాయి రూలింగ్.. డాలర్ ఢమాల్! వరుసగా ఐదో రోజు జైత్రయాత్ర
అంతర్జాతీయ ద్రవ్య మార్కెట్‌లో డాలర్ ఆధిపత్యానికి బ్రేక్ పడింది. అమెరికా ఆర్థిక వ్యవస్థలో ద్రవ్యోల్బణం భయపెడుతున్నప్పటికీ, యూఎస్ ఫెడరల్ రిజర్వ్ అధికారుల నుంచి వస్తున్న అప్రమత్త వ్యాఖ్యలు, ట్రెజరీ ఈల్డ్స్ తగ్గడం భారత రూపాయికి కొండంత బలాన్నిచ్చాయి. దీంతో దేశీయ కరెన్సీ గురువారం ట్రేడింగ్‌ను లాభాలతో ప్రారంభించి, వరుసగా ఐదో రోజు కూడా రూపాయి తన సత్తా చాటుకుంది.
ఓపెనింగ్‌లోనే అదరగొట్టిన రూపాయి.. డాలర్ రేటు ఎంతంటే?
అమెరికా డాలర్‌తో పోలిస్తే భారత రూపాయి గురువారం ఉదయం ఆరంభంలోనే 23 పైసలు కోలుకుని 94.92 వద్ద బలపడింది. నిన్నటి ముగింపులో డాలర్ మారకం విలువ 95.15 వద్ద నిలిచింది. గ్లోబల్ మార్కెట్‌లో డాలర్‌పై ఒత్తిడి పెరగడం, అదే సమయంలో ట్రేడ్ డేటా కోసం మార్కెట్లు ఆసక్తిగా ఎదురుచూస్తుండటంతో రూపాయి పుంజుకోవడానికి మార్గం సుగమమైంది.
ఆసియా కరెన్సీల మిశ్రమ ట్రేడింగ్.. ఒత్తిడిలో డాలర్ ఇండెక్స్
అంతర్జాతీయంగా ఆసియా ఖండానికి చెందిన పలు కరెన్సీలు కూడా డాలర్‌తో పోలిస్తే మెరుగైన ప్రదర్శన కనబరిచాయి. కొరియన్ వాన్ 0.16 శాతం లాభపడగా, మలేషియా రింగిట్, ఇండోనేషియా రుపియా, చైనా రెన్మిన్బీలు స్వల్పంగా లాభపడ్డాయి. మరోవైపు జపనీస్ యెన్, థాయ్ బాట్ వంటివి కొంత ముందంజ వేయలేకపోయాయి. డాలర్ ఇండెక్స్ 0.1 శాతం తగ్గి 102.06 స్థాయికి చేరడం రూపాయికి అనుకూలంగా మారింది.
ఎగుమతిదారులు, దిగుమతిదారులకు నిపుణుల సలహా!
భారతీయ రిజర్వ్ బ్యాంక్ రూపాయి విలువను ఒక నిర్ణీత పరిధిలోనే కొనసాగిస్తూ, మరీ దారుణంగా బలహీనపడకుండా చూస్తుండటంతో ఫారెక్స్ నిపుణులు కీలక సూచనలు చేస్తున్నారు. రూపాయి పెరిగిన ప్రతి సందర్భాన్ని ఎగుమతిదారులు తమకు అనుకూలంగా మలుచుకోవాలని, దిగుమతిదారులు సమీప కాల అవసరాల కోసమే ప్రీమియంలను దృష్టిలో ఉంచుకుని డాలర్లను కొనుగోలు చేయడం శ్రేయస్కరమని మార్కెట్ విశ్లేషకులు సూచిస్తున్నారు.
Click it and Unblock the Notifications
Sign in with Google
