శ్రీచక్ర అధిష్ఠాన శక్తిగా దుర్గమ్మ దర్శనం.. పులిహోర, పెసర బూరెల నైవేద్యం
ప్రముఖ పుణ్యక్షేత్రం ఇంద్రకీలాద్రిపై శరన్నవరాత్రి మహోత్సవాలు అత్యంత వైభవంగా, ఆధ్యాత్మిక శోభతో కొనసాగుతున్నాయి. కనకదుర్గమ్మవారి దివ్య దర్శనం కోసం రాష్ట్రపతి నుంచి సామాన్య భక్తుల వరకు పెద్ద ఎత్తున తరలిరావడంతో బెజవాడ నగరం భక్త జనసందోహంగా మారింది. శరన్నవరాత్రుల ఐదో రోజైన గురువారం నాడు జగన్మాత 'శ్రీ లలితా త్రిపురసుందరీదేవి' అలంకారంలో భక్తులకు కంటికి ఇంపుగా దర్శనమిస్తూ మురిపిస్తున్నారు. పరాశక్తి స్వరూపిణిగా, శ్రీచక్ర అధిష్ఠాన దేవతగా.. పంచదశాక్షరీ మహామంత్రాధి దేవతగా పూజలందుకుంటున్న అమ్మవారి ఈ దివ్య రూపం భక్తులలో ఆధ్యాత్మిక పారవశ్యాన్ని నింపుతోంది.
పసిడి వర్ణపు చీరలో త్రిపురసుందరి.. సర్వ శక్తుల సమ్మేళనం!
నేటి మహోత్సవంలో భాగంగా శ్రీ లలితా త్రిపురసుందరీదేవి అమ్మవారిని మనోహరమైన బంగారు వర్ణపు చీరతో అలంకరించారు. సౌందర్యం, అనంతమైన కరుణ, శక్తి, జ్ఞానాల సమ్మేళనంగా భాసించే లలితాదేవి రూపం ఎంతో ఆధ్యాత్మిక ప్రాధాన్యాన్ని కలిగి ఉంది. చేతిలో చెరకు విల్లు, పుష్పబాణాలు, పాశాంకుశాలను ధరించిన లలితాదేవికి.. శ్రీ మహాలక్ష్మీదేవి, శ్రీ సరస్వతీదేవి స్వయంగా సేవలు అందిస్తున్న అత్యంత పవిత్రమైన దివ్య స్వరూపంలో భక్తులు దర్శించుకుంటున్నారు. నిన్న ఒక్కరోజే లక్షకు పైగా భక్తులు అమ్మవారిని దర్శించుకుని తమ మొక్కుబడులు చెల్లించుకున్నారు.
అమ్మవారికి ప్రీతికరమైన నైవేద్యం.. లలితా సహస్రనామ పారాయణం!
శాస్త్రోక్తంగా శ్రీ లలితా త్రిపురసుందరీదేవికి పులిహోర, కమ్మటి పెసర బూరెలను నైవేద్యంగా సమర్పిస్తారు. ఈ రోజు అమ్మవారిని దర్శించుకుంటే కుటుంబ క్షేమం, నిండైన ఆరోగ్యం, ఐశ్వర్యం, శాంతి లభిస్తాయని విశ్వసిస్తారు. లలితా సహస్రనామ పారాయణం, విశేష కుంకుమార్చనలు, శ్రీచక్రారాధనలు చేయడానికి ఈ రోజు అత్యంత శ్రేష్టమైనదిగా భావిస్తారు.
క్యూలైన్లలో క్రమశిక్షణతో దర్శనం.. యంత్రాంగం పగడ్బందీ ఏర్పాట్లు!
ఇంద్రకీలాద్రికి తరలివచ్చే భక్తులకు ఎలాంటి అసౌకర్యం కలగకుండా దర్శనాలు కల్పించేందుకు దేవస్థానం, పోలీసు శాఖ మరియు జిల్లా యంత్రాంగం సమన్వయంతో పగడ్బందీ ఏర్పాట్లు చేశాయి. ఆలయ ప్రాంగణంలో క్యూలైన్లు వేగంగా కదిలేలా చూస్తున్నారు. భక్తులు అధికారుల సూచనలు పాటిస్తూ క్రమశిక్షణతో దర్శనం చేసుకుని, జగన్మాత దివ్యానుగ్రహాన్ని పొందాలని ఆలయ అధికారులు కోరుతున్నారు.
Click it and Unblock the Notifications
Sign in with Google
