రూపాయికి 62 పైసల బలం. ఆసియాలో మనమే టాప్
అంతర్జాతీయ మార్కెట్లో డాలర్ ఒత్తిళ్లను తట్టుకుంటూ భారత రూపాయి ఒక్కసారిగా పుంజుకుంది. రూపాయి క్షీణతకు అడ్డుకట్ట వేసేందుకు రిజర్వ్ బ్యాంక్ ఆఫ్ ఇండియా తీసుకున్న కీలక చర్యలు మార్కెట్లో ఆశించిన ఫలితాన్ని ఇచ్చాయి. దీంతో అక్టోబర్ 13 ఉదయం ట్రేడింగ్‌లో అమెరికన్ డాలర్‌తో పోలిస్తే రూపాయి ఏకంగా 62 పైసలు బలపడి 95.16 స్థాయి వద్ద అత్యంత బలంగా ప్రారంభమైంది. సోమవారం ట్రేడింగ్ ముగిసే సమయానికి 95.78 వద్ద ఉన్న రూపాయి, ఆర్బీఐ చొరవతో నెల రోజుల గరిష్ట స్థాయిని తాకింది.
ఆర్బీఐ మాస్టర్ ప్లాన్.. మార్కెట్లో డాలర్ కొనుగోళ్లకు బ్రేక్!
రూపాయి మరింత దిగజారకుండా ఆర్బీఐ ప్రవేశపెట్టిన కఠిన నిబంధనలతో కరెన్సీ మార్కెట్లో తీవ్ర మార్పులు కనిపించాయి. రూపాయి బలపడటంతో వ్యాపారులు, ఇన్వెస్టర్లు డాలర్లను కొనుగోలు చేయడానికి వెనుకాడారు. ఇది చిన్న తరహా దిగుమతిదారులకు పెద్ద ఉపశమనం కలిగించగా, పెద్ద మొత్తంలో దిగుమతులు చేసే సంస్థలు హెడ్జింగ్ కోసం బ్యాంకర్లకు అదనపు ఛార్జీలు చెల్లించాల్సి వచ్చింది. ఆర్బీఐ పర్యవేక్షణతో రూపాయి 95 నుంచి 96 శ్రేణిలోనే కదలాడుతుందని, ఈ అవకాశాన్ని ఉపయోగించుకుని ఎగుమతిదారులు, దిగుమతిదారులు తమ అంచనాలను సర్దుబాటు చేసుకుంటున్నారని విశ్లేషకులు చెబుతున్నారు.
ఆసియా కరెన్సీలు డౌన్.. రూపాయి ఒక్కటే అప్!
ఒకవైపు ఆసియా ఖండంలోని ప్రధాన దేశాల కరెన్సీలన్నీ డాలర్ ధాటికి విలవిలలాడుతుంటే, భారత రూపాయి మాత్రం ఊరటనిచ్చే ప్రదర్శన కనబరిచింది. సౌత్ కొరియన్ వాన్ 0.214 శాతం నష్టపోగా, తైవాన్ డాలర్, ఫిలిప్పీన్ పేసో, ఇండోనేషియా రుపియా, థాయ్ భట్, చైనీస్ యువాన్ కూడా క్షీణతను నమోదు చేశాయి. ఒక్క జపనీస్ యెన్ స్వల్పంగా పుంజుకోగా, సింగపూర్ డాలర్ స్థిరంగా ముగిసింది. ఆసియా వ్యాప్తంగా ప్రతికూల పవనాలు వీచినా రూపాయి మాత్రం లాభాల్లోకి రావడం ప్రాధాన్యత సంతరించుకుంది.
మిడిల్ ఈస్ట్ యుద్ద మేఘాలు.. ఎగిసిపడుతున్న డాలర్ ఇండెక్స్!
మిడిల్ ఈస్ట్‌తో పాటు ఉక్రెయిన్ ఎనర్జీ మౌలిక సదుపాయాలపై మళ్లీ దాడులు తీవ్రతరం కావడంతో అంతర్జాతీయంగా భౌగోళిక రాజకీయ ఉద్రిక్తతలు మళ్లీ పెరిగాయి. ఈ అనిశ్చితి కారణంతో సురక్షితమైన ఇన్వెస్ట్‌మెంట్‌గా భావించే అమెరికన్ డాలర్‌కు మళ్లీ గిరాకీ పెరిగింది. ప్రధాన ఆరు ప్రపంచ కరెన్సీలతో పోల్చే డాలర్ ఇండెక్స్ 102.56 వద్ద గత ఏడాది ఏప్రిల్ తర్వాత అత్యంత గరిష్ట స్థాయిల్లో కొనసాగుతోంది. ఇన్ని ప్రతికూలతల మధ్య కూడా ఆర్బీఐ సమర్థవంతమైన చర్యల వల్ల భారత రూపాయి డాలర్ ధాటిని తట్టుకుని నిలబడటం విశేషం.
Click it and Unblock the Notifications
Sign in with Google
