యాక్టివ్‌గా ఎందుకు లేననే అంశాన్ని బండి సంజయ్, లక్ష్మణ్‌ను అడగండి: రాములమ్మ సంచలనం

రాములమ్మ విజయశాంతి ఆగ్రహాం కట్టలు తెంచుకుంది. తనకు ఏ పని అప్పగించడం లేదని మండిపడ్డారు. బండి సంజయ్, లక్ష్మణ్ లక్ష్యంగా విమర్శలు చేశారు. తన సేవలను జాతీయ నాయకత్వం తీసుకుంటుంది.. కానీ రాష్ట్ర నాయకత్వం అడగడం లేదని గుర్తుచేశారు. పార్టీలో తాను ఎందుకు యాక్టివ్‌గా లేనో అనే అంశంపై బండి సంజయ్‌నే అడగాలని సూచించారు.

తనకు ఏ బాధ్యత ఇచ్చారని పార్టీలో పనిచేయాలని రాములమ్మ ప్రశ్నించారు. పార్టీ రాష్ట్ర నాయకత్వంపై అసంతృప్తి వ్యక్తం చేశారు. కరోనా వల్ల కొద్ది కాలంగా పార్టీకి దూరంగా ఉన్నానని వివరించారు. 24 ఏళ్ల నుంచి బీజేపీలో పనిచేస్తున్నాని తెలిపారు. ఏ బాధ్యత ఇచ్చారని పార్టీలో పనిచేయాలని అడిగారు. ఒకరిద్దరితో పార్టీలో పనులు జరగవని.. ప్రజా సమస్యలపై ఎవరికి అవగాహన ఉంటే వాళ్లను పార్టీలో ముందు వరుసలో ఉంచాలని కోరారు. బాధ్యత కలిగిన వారికి ప్రాధాన్యం ఇవ్వాలని.. అధిష్టానం దిశానిర్దేశం చేయాలని తెలిపారు.

పార్టీ తన సేవలను ఉపయోగించుకోవడం లేదని.. పార్టీ ఆదేశిస్తే ఎక్కడి నుంచైనా పోటీ చేస్తానని తెలిపారు. పార్టీలో ఏ పదవి ఇచ్చినా స్వీకరిస్తానని.. పార్టీలో తనకు పాత్ర లేకుండా చేయాలని అనుకుంటున్నారని ఆరోపించారు. పని ఇవ్వకుండా చేయమంటే తనేం చేయాలని అడిగారు. జాతీయ నాయకత్వంతో ఇబ్బంది లేదని.. రాష్ట్ర నాయకత్వమే తన సేవలను వాడుకోవడం లేదన్నారు. టీమ్ వర్క్‌తో పనిచేస్తే బీజేపీ విజయం సాధిస్తోందని.. ఒకరిద్దరితో అధికారంలోకి రాలేమని తెలిపారు.

సీనియర్ నేతలను కలుపుకొని పోకుంటే పార్టీకే నష్టం జరుగుతుందన్నారు. రాష్ట్ర పరిస్థితులపై జాతీయ నాయకత్వం దృష్టిసారించాల్సిన అవసరం ఉందన్నారు. బీజేపీ వల్ల తెలంగాణ రాష్ట్రానికి ఎక్కువ మేలు జరుగుతుందని విశ్వసిస్తున్నానని తెలిపారు. తాను ఎక్కడ నుంచి పోటీ చేయాలనేది పార్టీ నిర్ణయిస్తుందని విజయశాంతి కామెంట్ చేశారు.

English summary

bjp leader vijayashanti made hot comments on bandi sanjay and laxman.