ఒడిశాలో రూ. లక్ష కోట్లతో మెగా ప్రాజెక్ట్: అదానీ గ్రూప్ నుంచి యువతకు ఉద్యోగాల జాతర..!!
ఒడిశా పారిశ్రామిక చరిత్రలో సరికొత్త అధ్యాయం మొదలైంది. వేలాది మంది యువత కలలను సాకారం చేస్తూ, రాష్ట్ర భవిష్యత్తును మార్చేసే దిశగా ఒక అడుగు పడింది. అదానీ గ్రూప్, యునైటెడ్ అరబ్ ఎమిరేట్స్ (UAE) కు చెందిన ఇంటర్నేషనల్ హోల్డింగ్ కంపెనీ (IHC) భాగస్వామ్యంతో ఒడిశా ప్రభుత్వంతో చారిత్రాత్మక ఒప్పందం కుదుర్చుకుంది. దాదాపు రూ.1.08 లక్షల కోట్ల (11.5 బిలియన్ డాలర్లు) రికార్డు పెట్టుబడితో ఒడిశాలో సమగ్ర అల్యూమినియం ప్రాజెక్టును ఏర్పాటు చేయనున్నారు.
ఈ మెగా ప్రాజెక్ట్ కేవలం పరిశ్రమల స్థాపనే కాదు, ఒడిశాలోని వేలాది కుటుంబాల్లో వెలుగులు నింపే గొప్ప అవకాశం. ప్రాజెక్టు నిర్మాణ దశలోనే సుమారు 35,000 మందికి ఉపాధి లభించనుంది. ప్రాజెక్టు పూర్తయి పూర్తిస్థాయిలో అందుబాటులోకి వచ్చాక మరో 18,500 మందికి పైగా ప్రత్యక్ష ఉద్యోగాలు లభిస్తాయి. ఈ నిర్ణయం ఒడిశా యువతకు కొత్త నైపుణ్యాలను నేర్చుకునే వీలు కల్పించడమే కాకుండా, వారి జీవితాల్లో భరోసా నింపుతుంది. స్థానిక చిరు వ్యాపారులకు, సరికొత్త ఆశలతో ఎదురుచూస్తున్న ఎందరో నిరుద్యోగులకు ఇది కొండంత అండగా నిలుస్తుంది.
ఒడిశా అల్యూమినియం ప్రాజెక్ట్ ప్రత్యేకతలు
ఈ భారీ ప్రాజెక్టులో భాగంగా ఒడిశా ఒకే చోట అల్యూమినియం అనుబంధ రంగానికి చెందిన అన్ని పరిశ్రమలను నిర్మించనుంది. ఇందులో ఏడాదికి దాదాపు 40 లక్షల టన్నుల సామర్థ్యం కలిగిన అల్యూమినా రిఫైనరీ, 20 లక్షల టన్నుల సామర్థ్యంతో అల్యూమినియం స్మెల్టర్ మరియు 10 లక్షల టన్నుల సామర్థ్యంతో డౌన్స్ట్రీమ్ అల్యూమినియం పార్క్ ఏర్పాటు కానున్నాయి. వీటికి తోడు పరిశ్రమ అవసరాల కోసం 4,000 మెగావాట్ల అంతర్గత విద్యుత్ ప్లాంట్, మరో 400 మెగావాట్ల హరిత ఇంధన కేంద్రాన్ని కూడా అభివృద్ధి చేయనున్నారు.
ఒడిశా ముఖ్యమంత్రి మోహన్ చరణ్ మాఝీ, పరిశ్రమల శాఖ మంత్రి సంపద్ చరణ్ స్వైన్, ఐహెచ్సీ అబుదాబి ఎండీ సయ్యద్ బసర్ షుయెబ్ సమక్షంలో ఈ అవగాహన ఒప్పందం (MoU) కుదిరింది. ఒడిశాలోని అపారమైన ఖనిజ సంపద కేవలం ముడి సరుకుగా ఇతర ప్రాంతాలకు వెళ్లకుండా, ఇక్కడే విలువైన వస్తువులుగా మారడానికి ఈ వ్యూహం ఎంతో దోహదపడుతుంది. దేశంలోనే అతిపెద్ద బాక్సైట్ నిల్వలు కలిగి ఉన్న ఒడిశా, ఈ ప్రాజెక్ట్ ద్వారా దేశ పారిశ్రామిక ప్రగతికి గుండెకాయలా మారబోతోంది.
ఈ ఒప్పంద వేడుకలో అదానీ పోర్ట్స్ సీఈఓ కరణ్ అదానీ మాట్లాడుతూ, ఈ ప్రాజెక్ట్ ఒడిశా ఆర్థిక పురోగతిలో ఒక మైలురాయిగా నిలుస్తుందని ఆశాభావం వ్యక్తం చేశారు. వికసిత్ భారత్ 2047 లక్ష్య సాధనలో ఒడిశా పాత్ర అత్యంత కీలకమని ఆయన స్పష్టం చేశారు. అదానీ గ్రూప్ చైర్మన్ గౌతమ్ అదానీ సైతం ఒడిశా అభివృద్ధిని దేశ తూర్పు ప్రాంత ఆర్థిక వృద్ధికి చోదక శక్తిగా భావిస్తూ వచ్చారు. స్థానిక ప్రజల ప్రయోజనాలే పరమావధిగా ఈ ప్రాజెక్ట్ రూపుదిద్దుకుంటోందని సంస్థ ప్రకటించింది.
రాష్ట్ర ప్రభుత్వం మరియు పారిశ్రామిక దిగ్గజాలు సంయుక్తంగా తీసుకున్న ఈ నిర్ణయం ఒడిశా పారిశ్రామిక రూపురేఖలను శాశ్వతంగా మార్చేయడమే కాకుండా, రాబోయే తరాలకు సరికొత్త ఉపాధి మార్గాలను చూపిస్తుంది. సహజ వనరుల సద్వినియోగంతో పాటు స్థానిక యువత ఉపాధి కలలను నిజం చేసే ఈ మహా యజ్ఞం ఒడిశాను దేశంలోనే అగ్రగామిగా నిలబెడుతుంది అనడంలో ఎలాంటి సందేహం లేదు.
Click it and Unblock the Notifications
Sign in with Google