అఖిలేష్ Vs మమత: 'ఇండియా' కూటమి పగ్గాలు మారుతున్నాయా!

INDIA Bloc: బీహార్ అసెంబ్లీ ఎన్నికల్లో కాంగ్రెస్ ఘోర పరాజయం పాలైన నేపథ్యంలో విపక్ష ఇండియా కూటమి నాయకత్వంలో మార్పుపై మళ్లీ గుసగుసలు మొదలయ్యాయి. సమాజ్‌వాదీ పార్టీకి చెందిన ఓ ఎమ్మెల్యే.. ఆ పార్టీ అధినేత, కనౌజ్ ఎంపీ అయిన అఖిలేష్ యాదవ్ ప్రతిపక్ష కూటమికి నాయకత్వం వహించాలని బహిరంగంగా వ్యాఖ్యానించారు. అత్యంత రాజకీయ ప్రాధాన్యత కలిగిన ఉత్తరప్రదేశ్ రాష్ట్రంలో సొంతంగా ప్రభుత్వాన్ని ఏర్పాటు చేసే సామర్థ్యం తమ పార్టీకి ఉందని కూడా ఆయన పేర్కొన్నారు.

సమాజ్‌వాదీ పార్టీ నేత కీలక వ్యాఖ్యలు
లక్నో సెంట్రల్ ఎమ్మెల్యే అయిన రవిదాస్ మెహ్రోత్రా మాట్లాడుతూ.. "సమాజ్‌వాదీ పార్టీ అధ్యక్షుడు అఖిలేష్ యాదవ్ 'ఇండియా' కూటమికి నాయకత్వం వహించాలి. సొంతంగా ఉత్తరప్రదేశ్‌లో ప్రభుత్వాన్ని ఏర్పాటు చేసే సత్తా సమాజ్‌వాదీ పార్టీకి ఉంది" అని అన్నారు.ఎన్నికలు బ్యాలెట్ విధానంలో జరిపినట్లయితే బీహార్‌లో 'ఇండియా' కూటమి ప్రభుత్వాన్ని ఏర్పాటు చేసి ఉండేదని మెహ్రోత్రా అభిప్రాయపడ్డారు. అఖిలేష్ యాదవ్ ఈవీఎం వ్యవస్థను ప్రశ్నిస్తూ, బ్యాలెట్ ఓటింగ్‌ను తిరిగి తీసుకురావాలని పదేపదే డిమాండ్ చేస్తున్నారు.

చర్చకు కారణం: కాంగ్రెస్ పతనం
బీహార్ ఎన్నికల్లో కాంగ్రెస్ ఘోరంగా ఓడిపోయిన నేపథ్యంలో ఈ వ్యాఖ్యలు ప్రాధాన్యత సంతరించుకున్నాయి. 2020 ఎన్నికల్లో 19 సీట్లు గెలుచుకున్న కాంగ్రెస్, ఈసారి కేవలం ఆరు సీట్లకే పరిమితమైంది. రాహుల్ గాంధీ, మల్లికార్జున్ ఖర్గే వంటి అగ్రనేతలు ప్రచారం చేసినా ఫలితం లేకపోయింది. కాంగ్రెస్ మిత్రపక్షమైన ఆర్జేడీ సైతం 25 సీట్లలో మాత్రమే గెలిచి 2020లో సాధించిన సీట్ల సంఖ్య కంటే (50 సీట్లు) గణనీయంగా వెనుకబడింది. మొత్తం 243 అసెంబ్లీ స్థానాలున్న బీహార్‌లో ఎన్డీయే 202 సీట్లతో భారీ విజయాన్ని నమోదు చేసింది. గత లోక్‌సభ ఎన్నికల్లో సమాజ్‌వాదీ పార్టీ 37 లోక్‌సభ స్థానాలు గెలుచుకుని, కాంగ్రెస్ తర్వాత లోక్‌సభలో రెండో అతిపెద్ద ప్రతిపక్షంగా అవతరించింది.

ఇప్పటికే తెరపైకి మమతా బెనర్జీ పేరు!
బీహార్ ఎన్నికలకు ముందు నుంచే కాంగ్రెస్ వరుసగా రాష్ట్ర ఎన్నికల్లో బలహీనపడటంతో, కూటమి నాయకత్వం మార్పు గురించి 'ఇండియా' కూటమిలోని ఇతర పార్టీల నుండి డిమాండ్లు పెరుగుతున్నాయి. ఇంతకుముందు తృణమూల్ కాంగ్రెస్ ఎంపీ కళ్యాణ్ బెనర్జీ తమ పార్టీ అధినేత్రి మమతా బెనర్జీ 'ఇండియా' కూటమికి నాయకత్వం వహించాలని సూచించారు. కాంగ్రెస్ విఫలమైందని, ఇప్పుడు కూటమికి ఒక ముఖాన్ని ఎంచుకోవాల్సిన సమయం ఆసన్నమైందని ఆయన అన్నారు. ఆర్‌జేడీ అధినేత లాలూ ప్రసాద్ యాదవ్ కూడా గతంలో మమతా బెనర్జీకి 'ఇండియా' కూటమి నాయకత్వ బాధ్యతలు ఇవ్వాలని మద్దతు పలికారు. కాంగ్రెస్ పదేపదే ఎన్నికల్లో పేలవమైన ప్రదర్శన చేయడం, కీలక రాష్ట్రాల ఎన్నికల్లో ఓడిపోవడం వంటి పరిణామాలు ఇప్పుడు అఖిలేష్ యాదవ్ పేరును కూడా కూటమి నాయకత్వం రేసులోకి తెచ్చాయి.

English summary

After Congress' massive loss in the Bihar Assembly elections, leadership changes within the INDIA bloc are back in discussion. SP leaders propose Akhilesh Yadav for the top role, while Mamata Banerjee's name also resurfaces.