షాక్: జాతీయ గీతాన్ని నిషేధించిన స్కూల్, ప్రిన్సిపాల్, టీచర్ల రాజీనామా

అలహాబాద్: స్వాతంత్ర్య దినోత్సవం వేడుక అంటే ఏ పాఠశాలలోనైనా ఘనంగా జరిపేందుకు వారం ముందు నుంచే ప్రణాళికలు వేసుకుంటారు. అయితే ఈ పాఠశాల యాజమాన్యం మాత్రం అందర్నీ దిగ్భ్రాంతికి గురిచేసే నిర్ణయం తీసుకుంది. స్వాతంత్ర్య దినోత్సవం నాడు విద్యార్థులు జాతీయగీతాన్ని ఆలపించొద్దని ఉత్తరప్రదేశ్ రాష్ట్రంలోని అలహాబాద్‌కు చెందిన ఓ పాఠశాల మేనేజర్ ఆదేశాలు జారీ చేశాడు.

అలహాబాద్ నగరంలోని బఘారాలో ఉన్న జియా-ఉల్-హక్ పాఠశాలలో జాతీయ గీతంతో పాటు వందేమాతరం, సరస్వతి వందనాలను కూడా స్కూల్ మేనేజర్ నిషేధించాడు. జాతీయ గీతం మతానికి వ్యతిరేకంగా ఉందని.. దాన్ని పాఠశాలల్లో విద్యార్థులతో పాడించకూడదని మేనేజర్ ఆదేశాలు జారీ చేశాడు.

బఘారాలోని స్కూల్లో 330 విద్యార్థులు, 20 మంది టీచర్లు పనిచేస్తుండగా.. శుక్రవారం మేనేజర్ వివాదాస్పద వ్యాఖ్యలతో ఒకే సామాజిక వర్గానికి చెందిన ప్రిన్సిపాల్ తోపాటు 8మంది ఉపాధ్యాయులు రాజీనామా చేశారు.

స్వాతంత్ర్య దినోత్సవం తేదీ దగ్గరపడుతుండటంతో పాఠశాలలో సంబరాలకు ఏర్పాట్లుపూర్తి చేసి మేనేజర్‌కు ఇచ్చినట్లు ప్రిన్సిపాల్ రీతూ శుక్లా చెప్పారు. కాగా, వాటిని పరిశీలించిన మేనేజర్ వందేమాతరం, సరస్వతి వందనం, జాతీయ గీతాల్లోని పదాలు ఓ సామాజిక వర్గానికి వ్యతిరేకంగా ఉన్నాయని పేర్కొన్నట్లు తెలిపారు. విద్యార్థులతో వీటిని పాడించడానికి వీల్లేదని చెప్పినట్లు వివరించారు. దీనిని వ్యతిరేకించిన వాళ్లందరూ స్కూల్ నుంచి వెళ్లిపోవచ్చని చెప్పినట్లు తెలిపారు.

ఈ క్రమంలో ఎనిమిది టీచర్లు రాజీనామా చేశారని చెప్పారు. జాతీయ గీతంలోని 'భారత భాగ్య విధాత' అనే వరుసలో భారతదేశం దైవం కాదని, అల్లానే దైవమని మేనేజర్ వ్యాఖ్యనించినట్లు వివరించారు. జాతీయగీతాన్ని ఆలపించొద్దని విద్యార్థులు, టీచర్లను అడ్డగించే హక్కు ఎవరికీ లేదని.. జియా-ఉల్-హక్ స్కూల్ మేనేజర్‌ను విచారించి తగిన చర్యలు తీసుకుంటామని ఉత్తరప్రదేశ్ ప్రధాన కార్యదర్శి దీపక్ సింఘాల్ స్పష్టం చేశారు. కాగా, స్కూల్ మేనేజర్‌ను పోలీసులు అదుపులోకి తీసుకుని విచారిస్తున్నారు.

English summary

In a shocking incident, the management authority of A M Convent School in Allahabad has asked the school to ensure that the students do not sing the national anthem on Independence Day.