అమర్నాథ్ యాత్ర: జమ్మూకాశ్మీర్‌లో శాంతిభద్రతలపై హోంమంత్రి అమిత్ షా కీలక సమీక్ష

శ్రీనగర్: జమ్మూకశ్మీర్‌లో శాంతిభద్రతలపై సమీక్షించేందుకు కేంద్ర హోంమంత్రి అమిత్‌షా మంగళవారం సమావేశమయ్యారు. అత్యున్నత స్థాయి సమావేశానికి లెఫ్టినెంట్ గవర్నర్ మనోజ్ సిన్హా, కేంద్ర హోంశాఖ కార్యదర్శి అజయ్ భల్లాతో పాటు నిఘా, భద్రతా సంస్థల అధిపతులు హాజరయ్యారు.

కరోనా వైరస్ మహమ్మారి కారణంగా రెండేళ్లపాటు వాయిదా పడిన తర్వాత జూన్ 30న ప్రారంభం కానున్న అమర్‌నాథ్ యాత్రకు సంబంధించిన ఏర్పాట్లను కూడా ఈ సమావేశంలో పరిశీలించారు. అంతేగాక, ప్రతి యాత్రికుడికి రేడియో ఫ్రీక్వెన్సీ ఐడెంటిఫికేషన్ (ఆర్‌ఎఫ్‌ఐడి) ట్యాగ్‌లను అందజేస్తామని, తద్వారా వారి కదలికలను ట్రాక్ చేయవచ్చు, రూ. 5 లక్షలతో బీమా చేయబడుతుందని కేంద్ర హోం మంత్రిత్వ శాఖ తెలిపింది.

గత కొద్దిరోజులుగా కాశ్మీర్‌లో చోటుచేసుకున్న సంఘటనలు అమర్‌నాథ్ యాత్రకు ముందు భద్రతా బలగాలు ప్రజల భద్రతపై మరింత అవగాహన కల్పించవలసి వచ్చింది. యాత్ర ప్రారంభానికి ముందే ప్రయాణికుల భద్రత కోసం అదనపు భద్రతా బలగాలను ఆ ప్రాంతమంతా మోహరించారు.

ప్రయాణంలో కట్టుదిట్టమైన భద్రతా ఏర్పాట్లను దృష్టిలో ఉంచుకుని, డ్రోన్లు, యాంటీ-డ్రోన్ టెక్నాలజీని కూడా ఉపయోగించనున్నారు. అంతే కాకుండా సీసీ కెమెరాల ద్వారా ఆ ప్రాంతమంతా పర్యవేక్షించనున్నారు.

మే 12న బుద్గామ్ జిల్లాలో ప్రభుత్వ ఉద్యోగి రాహుల్ భట్‌ని తన కార్యాలయంలో ఉగ్రవాదులు హతమార్చారు. కాశ్మీరీ పండిట్ రాహుల్ హత్య జరిగిన ఒక రోజు తర్వాత, పోలీసు కానిస్టేబుల్ రియాజ్ అహ్మద్ థోకర్‌ను పుల్వామా జిల్లాలోని అతని నివాసంలో ఉగ్రవాదులు కాల్చి చంపారు. గత వారం, జమ్మూలోని కత్రా సమీపంలో బస్సులో మంటలు చెలరేగడంతో నలుగురు యాత్రికులు మరణించారు. కనీసం 20 మంది గాయపడ్డారు.

సమావేశంలో హోంమంత్రి ఇచ్చిన సూచనలు:

ప్రయాణికుల అవసరాలకు అనుగుణంగా శ్రీనగర్‌లో విమాన సర్వీసులను పెంచాలి.

6 వేల అడుగుల కంటే ఎక్కువ ఎత్తులో 100 పడకల ఆస్పత్రి నిర్మించాలి.

దారిలో ప్రయాణికులు ఉండేందుకు టెంట్ సిటీ ఏర్పాటు చేయాలి.

కొండచరియలు విరిగిపడటం వల్ల సంభవించే విపత్తును ఎదుర్కొనేందుకు ప్రత్యేక ఏర్పాట్లు చేయాలి.

ప్రయాణ మార్గంలో లైటింగ్‌ ఏర్పాటు చేయాలి.

కరోనావైరస్ కారణంగా కొండ గుహలో ఉన్న అమర్‌నాథ్ ఆలయానికి వార్షిక సందర్శన 2020, 2021లో జరగలేదు. 2019లో, ఆర్టికల్ 370 రద్దుకు ముందు, ఇది సంక్షిప్తీకరించబడింది. ఈ యాత్రలో దాదాపు 3 లక్షల మంది యాత్రికులు పాల్గొంటారని అంచనా వేయగా ఆగస్ట్ 11న యాత్ర ముగియవచ్చు.

English summary

Amit Shah Reviews Jammu and Kashmir Security Ahead Of Amarnath Yatra.