వాజపేయికి 'బంగ్లా విముక్తి' పురస్కారం: అందుకోనున్న ప్రధాని మోడీ
న్యూఢిల్లీ: భారత మాజీ ప్రధాని అటల్ బిహారీ వాజపేయిని బంగ్లాదేశ్ ప్రభుత్వం గౌరవించనుంది. పాకిస్ధాన్ నుంచి బంగ్లాదేశ్ స్వాతంత్ర్యం పొందడంలో అందించిన విశిష్ట సేవలకు గాను ఆయనకు ‘ఫ్రెండ్ ఆఫ్ బంగ్లాదేశ్ లిబరేషన్ వార్' పురస్కారం అందించాలని ఆ దేశ విదేశాంగ మంత్రిత్వ శాఖ తెలిపింది.
1971లో భారతీయ జన సంఘ్ అధ్యక్షుడిగా, ఎంపీగా విమోచన (లిబరేషన్) యుద్ధ సమయంలో బంగ్లాదేశ్ స్వాతంత్ర్యోద్యమానికి సంపూర్తిగా సహకరించారని పేర్కొన్నారు. జాతీయ, అంతర్జాతీయ వేదికలపై బంగ్లాదేశ్కు మద్దుతుగా నిలిచారని అందుకు గుర్తుగా ఈ ప్రతిష్ఠాత్మక పురస్కారాన్ని అందించనున్నట్లు విదేశాంగ శాఖ వెల్లడించింది.
అనారోగ్యం కారణంగా వాజపేయి బంగ్లాదేశ్లో పర్యటించలేరు కాబట్టి.... ఈనెల 6న బంగ్లాదేశ్ పర్యటనకు రానున్న ప్రధాని నరేంద్ర మోడీకి ఈ పురస్కారాన్ని అందజేయనున్నారు. ఈ నెల ఆరు నుంచి బంగ్లాదేశ్లో ప్రధాని మోడీ పర్యటించనున్న సంగతి తెలిసిందే.
మాజీ ప్రధాని ఇందిరాగాంధీకి ప్రకటించిన ఈ పురస్కారాన్ని ఆమె తరుపున 2012లో సోనియాగాంధీ స్వీకరించారు. ప్రస్తుత రాష్ట్రపతి ప్రణబ్ ముఖర్జీ కూడా ఈ అవార్డుని అందుకున్నారు. దీంతో పాటే బంగ్లా స్వాతంత్ర ఉద్యమంలో ప్రాణాలు కోల్పోయిన భారతీయ సైనికుల కుటుంబాలను గౌరవించాలని కూడా బంగ్లా ప్రధాని షేక్ హసీనా నేతృత్వంలోని కమిటీ నిర్ణయించింది.
Click it and Unblock the Notifications
Sign in with Google