ఎల్పీజీ గ్యాస్ సిలిండర్ ల బుకింగ్ పై కేంద్రం కీలకనిర్ణయం.. ధరలు ప్రియం!

గ్యాస్ వినియోగదారులకు కేంద్ర ప్రభుత్వం షాక్ ఇచ్చింది. గృహ వినియోగ ఎల్పిజి గ్యాస్ సిలిండర్ల బుకింగ్ కు సంబంధించి కేంద్ర ప్రభుత్వం తాజాగా కీలక నిర్ణయం తీసుకుంది. సిలిండర్ రీఫిల్ బుకింగ్లో మధ్య ఉన్న కనీస గడువును 21 రోజుల నుంచి 25 రోజులకు పెంచుతూ ప్రభుత్వం ఆదేశాలను జారీ చేసింది.

గ్యాస్ కొరత ఏర్పడుతుందని ఆందోళన

ఇరాన్ ఇజ్రాయిల్ మధ్య కొనసాగుతున్న యుద్ధ కారణంగా గ్యాస్ కొరత ఏర్పడవచ్చు అన్న అనుమానంతో వినియోగదారులు ముందస్తుగా గ్యాస్ సిలిండర్లు బుక్ చేసుకున్న వేళ కేంద్రం ఈ మార్పు దిశగా అడుగులు వేసింది. ముఖ్యంగా గల్ఫ్ దేశాల పైన ఇరాన్ దాడులు, హార్ముజ్ జల సంధిని మూసివేసిన పరిస్థితుల నేపథ్యంలో అంతర్జాతీయ చమురు ధరలు పెరుగుతాయని, గ్యాస్ కొరత ఏర్పడే అవకాశం ఉందని చాలామంది ఆందోళన వ్యక్తం చేశారు.

హార్ముజ్ జలసంధి మూసివేతతో భయం

ఈ క్రమంలో హార్ముజ్ జలసంధి ద్వారా చమురు సరఫరా తీవ్రంగా ప్రభావితం కావచ్చని భావిస్తున్నారు. అయితే దీనిపైన ఇరాన్ రెవల్యూషనరీ గార్డ్స్ అమెరికా, ఇజ్రాయిల్, యూరప్, పాశ్చాత్య మిత్ర దేశాల నౌకలకు మాత్రమే జలసంధిని మూసివేస్తామని వెల్లడించింది. హార్ముజ్ జల సంధిని మూసివేసిన పరిస్థితులతో భారతదేశంలో కూడా గ్యాస్ కొరత ఏర్పడవచ్చని, చమురు ధరలు పెరుగుతాయని ఆందోళన వ్యక్తం అయింది.

గ్యాస్ బుకింగ్ కనీస గడువు పెంపు

ఈ క్రమంలో భారత్లో చమురు నిల్వలు తగినంత ఉన్నాయని, ఎటువంటి కొరత ఏర్పడదని ప్రభుత్వ అధికారులు స్పష్టం చేస్తున్నారు. అయినప్పటికీ గృహ గ్యాస్ వినియోగదారులు, గ్యాస్ కొరత ఏర్పడుతుందన్న అనుమానంతో గ్యాస్ సిలిండర్లను అధిక సంఖ్యలో బుక్ చేస్తున్న క్రమంలో కేంద్ర ప్రభుత్వం కనీస గడువును 21 రోజుల నుంచి 25 రోజులకు పెంచుతూ ఆదేశాలు ఇచ్చింది.

ఎల్పీజీ గ్యాస్ సిలిండర్ ధరలు పెరుగుదల

మరోవైపు ఒక్కొక్క సిలిండర్ పైన సుమారు 60రూపాయల వరకు ధరను ఎల్పిజి అధికం చేసింది. ఎల్పిజి సరఫరా వ్యవస్థను పటిష్టం చేయడం కోసం ఈ చర్యలు అవసరమని కేంద్ర ప్రభుత్వం పేర్కొంది. మార్చి 7వ తేదీ నుంచి ఈ పెరిగిన ధరలు అమలులోకి వచ్చాయి. మరోవైపు వాణిజ్య వినియోగదారుల కంటే, గృహ వినియోగదారుల అవసరాల మేరకు వారికి ప్రాధాన్యత ఇవ్వాలని చమురు మార్కెటింగ్ సంస్థలకు కేంద్రం ఇప్పటికే స్పష్టమైన ఆదేశాలిచ్చింది.

ప్రస్తుతం గృహ వినియోగ గ్యాస్ ధరలు ఇలా

గ్యాస్ సరఫరా లో ఎటువంటి అవాంతరాలు లేకుండా చూడాలని పేర్కొంది. ఇక ఇటీవల పెరిగిన ఎల్పిజి గ్యాస్ ధరల విషయానికి వస్తే 14.2 కిలోల గృహ వినియోగ వంటగ్యాస్ సిలిండర్ ధర హైదరాబాద్ లో గతంలో 905 రూపాయలు ఉంటే ఇప్పుడు 965 రూపాయలకు చేరింది. దేశ రాజధాని ఢిల్లీలో 853 రూపాయల నుంచి 913 రూపాయలకు, ముంబైలో 852.50 పైసల నుంచి 912. 50 పైసలకు, కలకత్తాలో 879 రూపాయల నుంచి 930 రూపాయలకు, చెన్నైలో 868.50 పైసల నుంచి 928.50 పైసలకు గ్యాస్ సిలిండర్ ధరలు పెరిగాయి.

English summary

center decision.. LPG gas cylinder refill booking period from 21 to 25 days. The decision was taken by the Centre in the wake of increasing bookings due to suspected gas shortage.