భారత్-చైనా సరిహద్దుల్లో మళ్లీ ఘర్షణలు: రెండు వైపులా భద్రతా సిబ్బందికి గాయాలు

By Bbc Telugu

Updated: Monday, January 25, 2021, 21:26 [IST]

చైనా-భారత్ భద్రతా బలగాలు వివాదాస్పద సరిహద్దుల్లో మళ్లీ ఘర్షణలకు దిగినట్లు భారత మీడియా వార్తలు ప్రచురించింది. రెండు వైపులా భద్రతా సిబ్బంది గాయపడినట్లు పేర్కొంది.

ఉత్తర సిక్కింలో మూడు రోజుల క్రితం ఈ ఘర్షణలు చోటుచేసుకున్నట్లు సమాచారం.

లద్దాఖ్‌లోని వివాదాస్పద ప్రాంతంలో ఘర్షణల అనంతరం రెండు దేశాల మధ్య ఉద్రిక్త పరిస్థితులు తలెత్తిన సంగతి తెలిసిందే.

గత ఏడాది జూన్‌లో లద్దాఖ్‌లోని గాల్వన్ లోయలో చోటుచేసుకున్న ఈ ఘర్షణల్లో 20మంది భారత సైనికులు మరణించారు. వీటిలో మరణించిన చైనా సిబ్బందిపై ఎలాంటి సమాచారం లేదు.

తాజాగా సిక్కింలోని నకులా పాస్ దగ్గర ఘర్షణలు చోటుచేసుకున్నట్లు సైనిక అధికారుల సమాచారం.

భారత ప్రాంతాల్లోకి గస్తీ కాస్తున్న చైనా బృందం ప్రవేశించేందుకు ప్రయత్నించిందని, వారిని బలవంతంగా వెనక్కి పంపించామని అధికారులు తెలిపారు.