నన్నే ఆపుతావా?కాళ్లు పట్టుకో: పోలీసుతో బిజెపి నేత
మధ్యప్రదేశ్: విధుల్లో ఉన్న ఓ పోలీసు కానిస్టేబుల్తో అమర్యాదగా ప్రవర్తించి విమర్శల పాలవుతున్నారు ఓ భారతీయ జనతా పార్టీ నాయకుడు. విధి నిర్వహణలో భాగంగా కానిస్టేబుల్ ఆ నేత వాహనాన్ని ఆపి తనిఖీ చేశాడు. ఇందుకు ఆగ్రహించిన ఆ నేత.. తన కాళ్లు పట్టుకుని క్షమాపణ చెప్పాలని హుకుం జారీ చేశాడు.
మధ్యప్రదేశ్ రాష్ట్రంలో చోటుచేసుకున్న ఈ ఘటన వివరాలిలా ఉన్నాయి.. ఓం ప్రకాశ్ ధనావత్ అనే ఓ బిజెపి నాయకుడు తన కారులో వెళుతుండగా గంగారాం అనే కానిస్టేబుల్ తనిఖీ నిమిత్తం అతని కారు ఆపాడు. కాగా, తాను బిజెపి నేతనంటూ ఐడీ చూపించినా కానిస్టేబుల్ వినిపించుకోకుండా అతన్ని కారు దిగమని తనిఖీ చేశాడు.
విధి నిర్వహణ పట్ల కానిస్టేబుల్కి ఉన్న నిబద్ధతకు మెచ్చుకోవాల్సింది పోయి ఆ నేత ఆగ్రహించారు. నిమిషాల్లో తన కార్యకర్తలను పిలిపించారు. వారందరూ గంగారాంని చుట్టుముట్టడంతో భయపడిపోయిన గంగారాం ఓంప్రకాశ్ని క్షమాపణలు కోరాడు. అయినా వారు ఒప్పుకోకుండా కాళ్లు పట్టుకుని క్షమాపణలు కోరమని బలవంతం చేశారు.
కాగా, ఇదంతా స్థానిక మీడియా క్లిక్మనిపించడంతో ఆ ఫొటో వైరల్ అయింది. అయితే తాను కానిస్టేబుల్ని కాళ్లుపట్టుకోమని అడగలేదని అతని ప్రవర్తన నచ్చక ఇద్దరి మధ్య చిన్న గొడవైందని, అంతకంటే మరేం లేదని బిజెపి నేత ఓం ప్రకాశ్ చెప్పుకొచ్చారు. అయితే తాను బిజెపి నేతతో దురుసుగా ప్రవర్తించలేదని, కాళ్లు పట్టుకోలేదని కానిస్టేబుల్ తెలిపాడు.