85దేశాల్లో డెల్టా వేరియంట్ .. ఇదో ప్రమాదకర వేరియంట్, ముఖ్యంగా వారు బీ అలెర్ట్ : డబ్ల్యూహెచ్ఓ చీఫ్
కోవిడ్ -19 యొక్క డెల్టా వేరియంట్, కనీసం 85 దేశాలలో గుర్తించబడిందని, ఇది ఇప్పటివరకు గుర్తించిన వేరియంట్లలో అత్యంత వ్యాప్తి చేయగల వేరియంట్ అని, వ్యాక్సిన్స్ తీసుకోని వారిలో ఎక్కువ వ్యాప్తి చెందుతుందని ప్రపంచ ఆరోగ్య సంస్థ చీఫ్ టెడ్రోస్ అధనామ్ ఘెబ్రేయేసస్ హెచ్చరించారు. ప్రపంచవ్యాప్తంగా ప్రస్తుతం డెల్టా వేరియంట్ గురించి చాలా ఆందోళన ఉందని, ప్రపంచ ఆరోగ్య సంస్థ కూడా దాని గురించి ఆందోళన చెందుతోందని డైరెక్టర్ జనరల్ ఘెబ్రేయేసస్ వెల్లడించారు.
85 దేశాలలో డెల్టా వేరియంట్ వ్యాప్తి
డెల్టా వేరియంట్ను మొదట భారతదేశంలో గుర్తించారన్నారు. ఇప్పటివరకు గుర్తించిన వేరియంట్లలో డెల్టా అత్యంత ప్రమాదకరమైందని కనీసం 85 దేశాలలో గుర్తించబడిందని , వేగంగా వ్యాప్తి చెందుతోందని జెనీవాలో చెప్పారు.కొన్ని దేశాలు ప్రజారోగ్యం, అన్లాక్ చర్యలను సులభతరం చేస్తున్నందున, ప్రపంచవ్యాప్తంగా వ్యాప్తిలో పెరుగుదల కనిపించడం ప్రారంభించిందని ఆయన ఆందోళన వ్యక్తం చేశారు.కొత్త కోవిడ్ -19 వేరియంట్లు 35 కనిపిస్తున్నాయని పేర్కొన్న ప్రపంచ ఆరోగ్య సంస్థ చీఫ్ వాటి వ్యాప్తిని నిరోధించడం ద్వారానే వాటికి చెక్ పెట్టాలని సూచించారు.
ప్రమాదకర వేరియంట్ అంటున్న ప్రపంచ ఆరోగ్య సంస్థ
డెల్టా వేరియంట్ ఒక ప్రమాదకరమైన "వైరస్" అని ఆల్ఫా వేరియంట్ కంటే ఎక్కువ వ్యాప్తి చేయగలదని ప్రపంచ ఆరోగ్య సంస్థ కోవిడ్ -19 టెక్నికల్ లీడ్ డాక్టర్ మరియా వాన్ కెర్ఖోవ్ ఒక హెచ్చరికలో చెప్పారు. ఇది యూరప్ తో పాటుగా ప్రవేశించిన ఏ దేశంలోనైనా విపరీతంగా వ్యాప్తి చెందుతుందని వివరించారు.అనేక యూరోపియన్ దేశాలు కేసుల క్షీణతను చూస్తున్నాయి. కానీ మతపరమైన సంఘటనలు, సామాజిక దూరం నిబంధనలు పాటించకుండా జరుగుతున్న పలు కార్యక్రమాలు మళ్లీ కేసులను పెంచుతున్నాయి అంటూ పేర్కొన్నారు.
వ్యాక్సిన్ తీసుకుంటే కొంత రక్షణ
కొన్ని దేశాలలో ఇప్పటికీ వ్యాక్సినేషన్ కార్యక్రమం కొనసాగుతూనే ఉంది. అయినప్పటికీ ఆ దేశాల మొత్తం జనాభాకు ఇంకా టీకాలు వేయలేదని, చాలా మందికి వారి రెండవ మోతాదు లేదా కరోనా వ్యాక్సిన్ల పూర్తి మోతాదు ఇవ్వలేదని పేర్కొన్నారు. కోవిడ్ -19 వ్యాక్సిన్లు డెల్టా వేరియంట్తో సహా తీవ్రమైన వ్యాధి , మరణాలను నివారించడంలో చాలా ప్రభావవంతంగా ఉన్నాయని కెర్ఖోవ్ నొక్కిచెప్పారు. కాబట్టి అందరూ సాధ్యమైనంతవరకు వాక్సినేషన్ తీసుకోవడం అవసరమని పేర్కొన్నారు. వ్యాక్సిన్ లు తీసుకోని వారిలో చాలా త్వరగా వ్యాపిస్తుందని చెప్పారు.
వైరస్ లు పెరుగుతూనే ఉంటాయి, అప్రమత్తంగా ఉండాలి
వైరస్ అభివృద్ధి చెందుతూనే ఉంటుందని మనల్ని మనం కాపాడుకునే ప్రయత్నం నిరంతరాయంగా జరగాలని కెర్ఖోవ్ తెలిపారు. ప్రజలు తమను తాము సురక్షితంగా ఉంచుకోవాలని మరియు ప్రతిరోజూ ఏమి చేయాలో వారి గురించి వ్యక్తిగతంగా నిర్ణయాలు తీసుకోవాలని కోరారు. మనమందరం చేయాలనుకుంటున్నది చాలా ఉంది, కానీ ప్రస్తుతం మనం చేయవలసినవి చాలా లేవు కేవలం మన ఆరోగ్యాన్ని రక్షించడంలో తప్ప అని చెప్పారు.ఇది రాబోయే రెండు నెలలు కాదు మాత్రమే కాదు ఇప్పటి నుండే దాని గురించి ఆలోచిస్తూ ఉండాలి, ఎందుకంటే మనం తీసుకునే ప్రతి నిర్ణయం భవిష్యత్తు మీద ప్రభావం చూపిస్తుందని పేర్కొన్నారు.
కరోనా వ్యాక్సినేషన్ యుద్ధ ప్రాతిపదికన సాగించాలి
డెల్టా వ్యాప్తిని నివారించడానికి అన్ని మార్గాల ద్వారా ప్రయత్నించడం మరింత అత్యవసరం అని పేర్కొన్నారు . కరోనా వ్యాక్సినేషన్ పై పదేపదే ప్రపంచ ఆరోగ్య సంస్థ సూచించటానికి కారణం ఇదేనని వెల్లడించారు. జూన్ 22 న డబ్ల్యూహెచ్ఓ విడుదల చేసిన కోవిడ్ 19 వీక్లీ ఎపిడెమియోలాజికల్ అప్డేట్ ప్రకారం, ప్రపంచవ్యాప్తంగా 170 దేశాలు, భూభాగాలు లేదా ప్రాంతాలలో ఆల్ఫా వేరియంట్, 119 దేశాలలో బీటా, 71 దేశాలలో గామా మరియు 85 దేశాలలో డెల్టా నివేదించబడ్డాయి.
ప్రస్తుతం ప్రపంచ వ్యాప్తంగా నాలుగు వేరియంట్లు
ఆల్ఫా, బీటా, గామా మరియు డెల్టా నిశితంగా పరిశీలించబడుతున్న నాలుగు ప్రస్తుత వేరియంట్లు విస్తృతంగా ఉన్నాయని ప్రపంచ ఆరోగ్య సంస్థ వెల్లడించింది. డెల్టా వేరియంట్ ఆల్ఫా వేరియంట్ కంటే గణనీయంగా ఎక్కువ వ్యాప్తి అవుతుందని ప్రస్తుత పోకడలు కొనసాగితే ప్రపంచవ్యాప్తంగా దాని ఆధిపత్యం కొనసాగుతుందని, కంట్రోల్ చేయడం కష్టమవుతుందని వెల్లడించారు. అందుకే అప్రమత్తంగా ఉండాలని సూచించారు.
Click it and Unblock the Notifications
Sign in with Google