Video: చావు అంచుల దాకా వెళ్లి.. గాల్లో 4 గంటల నరకం
Fly91, Hyderabad to Hubli Flight, Mid-air Terror, Aviation News 2026, Flight IC3401, Hubli Airport Weather, Bengaluru Airport, Emergency Landing, Fly91 Airline Crisis, Passenger Panic, Indian Aviation Safety, Flight Dive
హైదరాబాద్ టూ హుబ్లీ.. ఫ్లైట్ చేరాల్సిన సమయం దాటిపోయింది. కింద చూస్తే కారుమబ్బులు, పైన చూస్తే ప్రాణాల కోసం ప్రార్థనలు. ఆ విమానం ఒక గూడు లేని పక్షిలా గాల్లోనే చక్కర్లు కొడుతుంటే.. లోపల ప్రయాణికుల గుండె చప్పుడు వేగమందుకుంది. నిమిషం ఒక యుగంలా గడిచింది. అది సాంకేతిక లోపమా? లేక ప్రకృతి ప్రకోపమా? అంతుచిక్కని ఆందోళన మధ్య 'ఫ్లై91' ప్రయాణికులు అనుభవించిన ఆ నరకం అంతా ఇంతా కాదు!
సోమవారం మధ్యాహ్నం సరిగ్గా 3 గంటలకు.. హైదరాబాద్ రాజీవ్ గాంధీ అంతర్జాతీయ విమానాశ్రయం నుంచి 'ఫ్లై91' (IC3401) విమానం ప్రశాంతంగా గాల్లోకి లేచింది. అంతా సవ్యంగా ఉంటే సాయంత్రం 4:30 కల్లా హుబ్లీలో ల్యాండ్ అవ్వాలి. కానీ, విధి మరోలా తలచింది. హుబ్లీ గగనతలంలోకి చేరుకోగానే వాతావరణం ఒక్కసారిగా మారిపోయింది. ప్రతికూల పవనాలు, దట్టమైన మేఘాలు ల్యాండింగ్కు రెడ్ సిగ్నల్ ఇచ్చాయి. ఎయిర్ ట్రాఫిక్ కంట్రోల్ (ATC) నుండి అప్రమత్తత సందేశం రావడంతో పైలట్ విమానాన్ని గాల్లోనే ఉంచాల్సి వచ్చింది.
దిక్కుతోచని స్థితిలో నాలుగు గంటల ప్రయాణం
పైలట్కు పరిస్థితి తెలుసు, కానీ ప్రయాణికులకు మాత్రం ఏం జరుగుతుందో అర్థం కాలేదు. ముండుగోడు, దావణగెరె, శివమొగ్గ.. ఇలా ఒక ప్రాంతం తర్వాత మరో ప్రాంతం మీదుగా విమానం చక్కర్లు కొడుతూనే ఉంది. గంటలు గడుస్తున్నా చక్రాలు నేలకు ఆనకపోవడంతో ప్రయాణికుల్లో భయం మొదలైంది. విమానం ఒక్కసారిగా కుదుపులకు లోనైనప్పుడు (Turbulence) లోపల హాహాకారాలు మిన్నంటాయి. "ఓ మై గాడ్.. ఏం జరుగుతోంది?" అంటూ కొందరు, కన్నీరు మున్నీరవుతూ దేవుడిని వేడుకుంటున్న మరికొందరు.. ఆ దృశ్యాలు చూస్తుంటే ప్రాణాలు అరచేతిలో పెట్టుకోవడం అంటే ఏంటో అర్థమవుతుంది.
"ప్లీజ్.. మమ్మల్ని కాపాడండి.. ఎక్కడో చోట దింపేయండి!" అంటూ ఓ మహిళా ప్రయాణికురాలు రోదించిన తీరు అక్కడున్న వారిని మరింత కలిచివేసింది.
#Hubballi
— Arunkumar Huralimath (@arunkbh) April 20, 2026
Crosswind over Hubballi forced to divert @fly91_IN flight to #Bengaluru after four hours hovering over city. Passengers were anxious over extended holding time.@DeccanHerald @anithapailoor @HubliCityeGroup @Hubballi_Infra @hublimandi @Namma_Dharwad @Namma_HD pic.twitter.com/3amTIeu4c6
పైలట్పై ప్రయాణికుల ఆగ్రహం..
సమాచారం అందకపోవడంతో ప్రయాణికుల ఓపిక నశించింది. "ఎందుకు ఇలా చేస్తున్నారు? బెంగళూరుకో, బెళగావికో మళ్లించవచ్చు కదా!" అంటూ కొందరు కేకలు వేశారు. విమానంలో గందరగోళం పెరగడంతో పైలట్ మైకు అందుకుని, "మేము పరిస్థితిని గమనిస్తున్నాం, దయచేసి సహకరించండి" అని కోరినప్పటికీ, గాలిలో తేలుతున్న ఆ సమయంలో ఆ మాటలు ఎవరికీ ఊరటనివ్వలేదు.
సేఫ్ ల్యాండింగ్.. కానీ మిగిలిన చేదు జ్ఞాపకం..
దాదాపు నాలుగు గంటల ఉత్కంఠ తర్వాత, రాత్రికి విమానాన్ని బెంగళూరులోని కెంపేగౌడ అంతర్జాతీయ విమానాశ్రయానికి మళ్లించారు. విమానం క్షేమంగా ల్యాండ్ అవ్వగానే ప్రయాణికులు ఊపిరి పీల్చుకున్నారు. అయితే, ల్యాండింగ్ తర్వాత కూడా సంస్థ నుంచి సరైన స్పందన లేకపోవడంపై ప్రయాణికులు ఆగ్రహం వ్యక్తం చేశారు.
ఎయిర్లైన్స్ వివరణ..
ఈ ఘటనపై 'ఫ్లై91' స్పందిస్తూ.. "విమానంలో ఎలాంటి సాంకేతిక లోపం లేదు. హుబ్లీలో వాతావరణం అనుకూలించకపోవడం వల్లే ప్రయాణికుల భద్రత దృష్ట్యా ఈ నిర్ణయం తీసుకున్నాం. మా సిబ్బంది ఇలాంటి పరిస్థితులను ఎదుర్కోవడంలో సుశిక్షితులు" అని స్పష్టం చేసింది. సాంకేతికత ఎంత పెరిగినా, ప్రకృతి ముందు మనిషి ఎంత అల్పుడో మరోసారి ఈ ఘటన నిరూపించింది.
Click it and Unblock the Notifications
Sign in with Google