వెనక్కి తగ్గిన ప్రభుత్వం: 'సంచార్ సాథి' యాప్ ప్రీ-ఇన్‌స్టాలేషన్ తప్పనిసరి రద్దు!

Sanchar Saathi App: సైబర్ మోసాల నుంచి పౌరులను రక్షించేందుకు ఉద్దేశించిన 'సంచార్ సాథి' పోర్టల్ అధికారిక మొబైల్ యాప్‌ను దేశంలో విక్రయించే అన్ని కొత్త స్మార్ట్‌ఫోన్లలో తప్పనిసరిగా ఇన్‌స్టాల్ చేయాలంటూ కేంద్ర ప్రభుత్వం గతంలో జారీ చేసిన ఆదేశాన్ని బుధవారం ఉపసంహరించుకుంది. ఈ ఆదేశంపై విపక్షాలు, డిజిటల్ హక్కుల సంస్థల నుంచి వచ్చిన తీవ్ర వ్యతిరేకత తర్వాత ఈ నిర్ణయం తీసుకున్నారు.

స్వచ్ఛందంగానే యాప్ డౌన్‌లోడ్
తాజాగా విడుదల చేసిన ప్రకటనలో.. టెలికమ్యూనికేషన్స్ విభాగం ఆ ఆదేశాన్ని ఉపసంహరించుకుంటున్నట్లు తెలిపింది. కేవలం గత 24 గంటల్లోనే 6 లక్షల మందికి పైగా వినియోగదారులు స్వచ్ఛందంగా ఈ యాప్‌ను గూగుల్ ప్లే స్టోర్, యాప్ స్టోర్ నుంచి డౌన్‌లోడ్ చేసుకున్నారని ప్రభుత్వం పేర్కొంది. అవగాహన ప్రచారం విజయవంతం కావడంతో, ఈ యాప్‌ను బలవంతంగా ప్రీ-ఇన్‌స్టాల్ చేయాల్సిన అవసరం లేదని ప్రభుత్వం భావించింది. ఈ యాప్ వినియోగం పూర్తిగా స్వచ్ఛందంగా ఉంటుందని ప్రభుత్వం స్పష్టం చేసింది. "యాప్‌ను స్వీకరించే తీసుకునే ప్రక్రియను వేగవంతం చేయడానికి మాత్రమే" ప్రీ-ఇన్‌స్టాలేషన్ ఆదేశం జారీ చేశామని, తప్పనిసరి చేయడానికి కాదని ప్రభుత్వం పేర్కొంది. పౌరుల గోప్యత, డేటా భద్రతకు అత్యంత ప్రాధాన్యత ఇవ్వబడుతుందని హామీ ఇచ్చింది.

ఎందుకు వ్యతిరేకత వచ్చింది?
ప్రభుత్వం ఈ ఆదేశాన్ని జారీ చేయగానే, దేశవ్యాప్తంగా దీనిపై తీవ్ర నిరసన వ్యక్తమైంది. కాంగ్రెస్, ఆప్, టీఎంసీ సహా పలు విపక్ష పార్టీలు, డిజిటల్ హక్కుల సంస్థలు (ఇంటర్నెట్ ఫ్రీడమ్ ఫౌండేషన్ వంటివి) దీనిని "పౌరుల గోప్యతపై దాడి"గా అభివర్ణించాయి. ప్రభుత్వ యాప్‌ను బలవంతంగా ఫోన్‌లో ఇన్‌స్టాల్ చేయించడం అనేది రాజ్యాంగంలోని ఆర్టికల్ 21 (జీవించే హక్కు) ప్రకారం హామీ ఇవ్వబడిన గోప్యత హక్కును ఉల్లంఘించడమేనని విపక్షాలు వాదించాయి. ఈ యాప్ ద్వారా పౌరులపై అనవసరంగా నిఘా పెట్టే అవకాశం ఉందని, 2021లో జరిగిన పెగాసస్ స్పైవేర్ ఉదంతం మళ్లీ గుర్తుకొస్తోందని విమర్శించారు.

యాపిల్, శాంసంగ్ వంటి పెద్ద స్మార్ట్‌ఫోన్ కంపెనీలు కూడా ఈ నిబంధనపై అసౌకర్యంగా ఉన్నాయని, అంతర్జాతీయ స్థాయిలో దీనిని సవాలు చేయడానికి సిద్ధమవుతున్నాయని సమాచారం.

కేంద్రానికి వ్యతిరేకంగా ఆపిల్, గూగుల్ వ్యూహం!
'సంచార్ సాథి' యాప్‌ను దేశంలో విక్రయించే అన్ని కొత్త స్మార్ట్‌ఫోన్లలో తప్పనిసరిగా ప్రీ-ఇన్‌స్టాల్ చేయాలనే కేంద్ర ప్రభుత్వ ఆదేశాన్ని సవాల్ చేయడానికి గూగుల్, ఆపిల్ వంటి దిగ్గజ టెక్ కంపెనీలు సిద్ధమయ్యాయని సమాచారం. పౌరుల గోప్యత, పరికర భద్రతపై తీవ్ర ఆందోళనల కారణంగా ఈ కంపెనీలు ఈ ఆదేశాన్ని గట్టిగా వ్యతిరేకించాయి.

టెక్ దిగ్గజాలు ఎందుకు వ్యతిరేకిస్తున్నాయి?
ప్రభుత్వం జారీ చేసిన ఈ తప్పనిసరి ప్రీ-ఇన్‌స్టాలేషన్ ఆదేశాన్ని అనేక ప్రముఖ స్మార్ట్‌ఫోన్ తయారీ సంస్థలు గట్టిగా వ్యతిరేకించాయి. వారి ఆందోళనలు ప్రధానంగా మూడు అంశాల చుట్టూ తిరుగుతున్నాయి. ప్రభుత్వ యాప్‌ను ముందస్తుగా ఇన్‌స్టాల్ చేయడం వల్ల ఆపరేటింగ్ సిస్టమ్ భద్రత, స్థిరత్వం దెబ్బతినే అవకాశం ఉంది. సిస్టమ్ స్థాయిలో ఉండే తొలగించలేని యాప్ సున్నితమైన పరికర సమాచారాన్ని యాక్సెస్ చేసే అవకాశం ఉంది. ప్రస్తుతం ప్రపంచవ్యాప్తంగా ఏ పెద్ద గ్లోబల్ ఆపరేటింగ్ సిస్టమ్ కూడా ప్రభుత్వ అప్లికేషన్‌లను డిఫాల్ట్‌గా ప్రీ-ఇన్‌స్టాల్ చేయడానికి అనుమతించడం లేదు. తమ ప్లాట్‌ఫారమ్‌లపై వినియోగదారుల విశ్వాసాన్ని దెబ్బతీసే ప్రపంచవ్యాప్త ఉదాహరణగా ఈ నిబంధన మారుతుందని టెక్ దిగ్గజాలు భయపడుతున్నాయి.

భద్రతపై ప్రభుత్వ వైఖరి
సంచార్ సాథి కార్యక్రమంపై వస్తున్న ఆందోళనలకు కేంద్ర ప్రభుత్వం సమాధానమిచ్చింది. ఈ యాప్ వినియోగదారులపై నిఘా పెట్టడానికి కాదని, వారి భద్రత కోసం ఉద్దేశించినదని అధికారులు సమర్థించుకున్నారు. దొంగిలించబడిన ఫోన్లను తిరిగి ఉపయోగించకుండా నిరోధించడం, నకిలీ IMEI చలామణిని అడ్డుకోవడం, డిజిటల్ కమ్యూనికేషన్‌ను సురక్షితం చేయడమే తమ లక్ష్యమని అధికారులు స్పష్టం చేశారు. వినియోగదారుల ఆందోళనను తగ్గించేందుకు, ఈ యాప్‌ను ఉపయోగించడానికి ఇష్టం లేని వారు తొలగించుకునే అవకాశం ఉంటుందని కూడా ప్రభుత్వం స్పష్టం చేసింది.

English summary

The Indian government has withdrawn its directive mandating the pre-installation of the Sanchar Saathi app on all new smartphones after political backlash and privacy concerns.